ՊԷՅՐՈՒԹ, «Ռոյթըրզ».- Լիբանանի մայրաքաղաքի հարաւային արուարձանները Չորեքշաբթի, Փետրուար
19ի առաւօտեան դարձեալ ցնցուեցան երկու պայթումներու հետեւանքով: Պայթումները տեղի
ունեցան Պիր Հասան շրջանին մէջ, իրանեան մշակութային կեդրոնի մը մօտ՝ խլելով առնուազն
վեց զոհեր եւ տասնեակներով վիրաւորներ: Ըստ նախնական տուեալներու՝ իրարմէ 50 մեթր
հեռաւորութեան վրայ տեղի ունեցած երկու պայթումներէն առնուազն մէկը անձնասպանական գործողութեան
հետեւանք էր: Յարձակումին պատասխանատուութիւնը ստանձնեց «Քայիտա»ի զինակից «Ապտալլա
Ազզամ ջոկատներ» անունով ծանօթ խմբակը, որ ստանձնած էր նաեւ Պէյրութի իրանեան դեսպանատան
վրայ յարձակումին պատասխանատուութիւնը: Խմբակը սպառնացած է Իրանի եւ «անոր կուսակցութեան»,
այսինքն՝ «Հըզպալլա»ի, վրայ յարձակումները շարունակել: Միւս կողմէ, Չորեքշաբթի օր
հրթիռներ ինկած են Լիբանանի Պեքաա հովիտի արեւելեան շրջաններուն մէջ, որոնց արձակման
պատասխանատուութիւնը ստանձնած է Սուրիոյ մէջ իշխանութեանց դէմ ճակատող եւ «Քայիտա»ի դաշնակից
«Նուսրա Ճակատ»ի հրամանատարութիւնը: Այս յարձակումը մարդկային զոհեր չէ խլած: