Երեքշաբթի, Փետրուար 18ի երեկոյեան, Ուքրանիոյ մայրաքաղաք Քիեւի մէջ սկսան եւ Չորեքշաբթի
օր շարունակուեցան ծանր բախումներ՝ ամիսներէ ի վեր մայրաքաղաքի Եւրոպական հրապարակին
վրայ ցոյց կատարողներուն եւ ոստիկանութեան միջեւ: Ըստ Չորեքշաբթի օրուան տուեալներուն՝
առնուազն 28 զոհ արձանագրուած է ցուցարարներու եւ ոստիկանութեան շարքերուն մէջ: Կառավարութիւնը
որոշեց փակել Քիեւ տանող բոլոր ճամբաները եւ Չորեքշաբթի օր պաշտօնազրկեց բանակի հրամանատարը,
տագնապին յաւելեալ սրումէն խուսափելու համար: Եւրոպական յանձնաժողովի նախագահ Ժոզէ
Մանուէլ Պարոսօ խօսեցաւ «քաղաքական ղեկավարութեան» պատասխանատուութեան մասին, իսկ Եւրոպական
Միութեան անդամ շարք մը երկիրներ յայտնեցին, որ կասկած չունին, թէ դէպքերուն պատասխանատուները
ուքրանական իշխանութիւններն են: