Papa: për të njohur Jezusin, nuk mjafton katekizmi, duhet ta ndjekim si nxënës
Jezusi njihet duke i shkuar pas, më mirë se duke e studiuar, pohoi Papa Françesku
gjatë meshës së mëngjesit, në Shtëpinë e Shën Martës. Çdo ditë, shpjegoi Papa, Krishti
na pyet kush është ai për ne, por përgjigjen mund ta japim duke jetuar si nxënësit
e tij.
Nëse i krishteri
dëshiron të dijë kush është me të vërtetë Jezusi për të, duhet të jetojë si nxënës
i tij e jo si studiues i tij. Duhet të ecë gjurmëve të mësuesit, ku mund të ndërthuren
dëshmi të pastra e tradhti, rrëzime e hove të reja, e ku nuk arrihet vetëm njohja
intelektuale. Papa Françesku merr si model Pjetrin, të cilin Ungjilli i sotëm e paraqet
njëkohësisht si dëshmitar guximtar – ai që, pyetjes së Jezusit, drejtuar apostujve:
“Po ju, kush thoni se jam unë?”, i përgjigjet: “Ti je Krishti” – e menjëherë pastaj
si kundërshtar, kur e qorton Jezusin, pasi ai tregon se duhet të vuajë e të vdesë,
për t’u ringjallur. “Shpesh herë – vëren Papa – Jezusi na drejtohet neve e na pyet:
Po për ty, kush jam unë?” dhe merr “të njëjtën përgjigje si ajo e Pjetrit, atë që
kemi mësuar në katekizëm”. Por kjo nuk mjafton:
“Duket se, për t’iu përgjigjur
pyetjes, që të gjithë e ndjejmë në zemër – ‘Kush është Jezusi për ne?’ – nuk mjafton
ajo që kemi mësuar dhe studiuar në katekizëm, i cili është i rëndësishëm, duhet ta
studiojmë e ta njohim, por nuk mjafton. Për të njohur Jezusin, duhet të bëjmë udhën
që ka bërë Pjetri: pas këtij poshtërimi, Pjetri ka ecur përpara me Jezusin, ka parë
mrekullitë që bënte Jezusi, ka parë pushtetin e tij, pastaj ka paguar taksat, siç
i kishte thënë Jezusi: ka zënë një peshk, ka hequr një monedhë dhe ka parë shumë mrekulli
të tilla. Por, në një farë pike, Pjetri e mohoi Jezusin, e tradhtoi Jezusin dhe mësoi
atë dijen aq të vështirë të lotëve, të vajit – më shumë se dije, urti “.
Pjetri,
vijoi Papa Françesku, i kërkon falje Jezusit dhe, pavarësisht nga kjo, pas ringjalljes,
Jezusi e pyet tri herë, në bregun e Tiberiadit dhe ndoshta – thotë Papa – ndërsa pohonte
dashurinë e vet totale për Mësuesin e tij, qau e u turpërua, duke kujtuar kohën kur
e kishte mohuar tri herë:
“Pyetja e parë – ‘Po ju, kush thoni se jam unë’
– drejtuar Pjetrit, kuptohet vetëm udhës, pas një udhe të gjatë, pas një udhe me hir
e me mëkate, pas udhës së nxënësit. Jezusi, nuk i ka thënë Pjetrit, as Apostujve të
vet, “Më njih!”, por “Më ndiq!”. Ndjekja e Jezusit na bën ta njohim Jezusin. Ta ndjekim
Jezusin me virtytet tona, edhe me mëkatet tona, por ta ndjekim Jezusin gjithmonë.
Gjëja e domosdoshme nuk është studimi i gjërave të domosdoshme, por jeta prej nxënësi”.
Është i nevojshëm, ngulmon Papa Françesku, “takimi i përditshëm me Zotin,
çdo ditë, me fitoret e dobësitë tona”. Por, shton më tej, këtë rrugë nuk mund ta bëjmë
vetëm. Duhet ndihma e Shpirtit të Shenjtë:
“Njohja e Jezusit është dhuratë
e Atit. Ai na bën ta njohim Jezusin. Është punë e Shpirtit të Shenjtë, i cili është
punëtor i madh. Nuk është sindikalist, është punëtori i madh e punon brenda nesh,
gjithmonë. Punon për të shpjeguar misterin e Jezusit dhe për të na dhënë ndjesinë
e Krishtit. Të shohim Jezusin, Pjetrin, apostujt dhe të ndjejmë në zemër këtë pyetje:
Kush jam unë për ty? E, si nxënës, t’i lutemi Atit të na japë njohjen e Krishtit,
në Shpirtin e Shenjtë, e të na e shpjegojë këtë mister”.