Papa Françesku në audiencën e përgjithshme: “Mos kini frikë nga Rrëfimi! Është përqafim
i Zotit”
Pajtimi është dhanti e Shpirtit Shenjt. Vetëm nëse pajtohemi, nëpër Zotin tonë Jezu
Krishtin, me Atin e me vëllezërit, mund të jemi vërtet në paqe. Këtë nënvizoi sot
paradite Papa, gjatë audiencës së përgjithshme, kremtuar në Sheshin e Shën Pjetrit,
në një ditë me shenjat e ndjeshme të pranverës. Ati i Shenjtë e përqendroi katekizmin
tek Sakramenti i Rrëfimit.
Të ndiemët e
mëkateve, falja e fajeve, tha Papa, nuk është fryt i përpjekjeve vetjake, por dhuratë
e Shpirtit Shenjt, që e shëron shpirtin tonë të brishtë: “Falja e
mëkateve nuk është gjë, që mund ta bëjmë vetë. Nuk mund të them: ‘Unë ia fal vetes
mëkatet!’. Ndjesa kërkohet, i kërkohet një tjetri, e në Rrëfim ia kërkojmë faljen
Jezusit”. Vetëm kur na falen mëkatet, mund të gjejmë paqen e vërtetë të
shpirtit: “E këtë e ndjejmë të gjithë kur shkojmë të rrëfehemi, me
një peshë të rëndë në shpirt e jo pa trishtim... E kur dëgjojmë se Jezusi na fali,
mbi shpirtin tonë ndehet paqja, një paqe tejet e bukur, që vetëm Jezusi mund ta japë,
vetëm Ai”. Vendi ku e ndjejmë praninë e Shpirtit Shenjt, shtoi Papa, është
bashkësia e krishterë: “Ja, pra, pse nuk mjafton t’i lypim falje Zotit në
mendjen e në zemrën tonë, por është e nevojshme t’ia rrëfejmë me përvujtëri e besim
mëkatet tona Meshtarit, ministrit të Kishës”. Në kremtimin e këtij Sakramenti,
meshtari nuk përfaqëson vetëm Zotin...: “...por gjithë bashkësinë, që pranon
brishtësinë e çdo anëtari të saj, që e ndjen, e prekur në shpirt, pendimin e secilit,
pajtohet me të, i jep zemër dhe e shoqëron në udhën e kthimit e të pjekurisë njerëzore
e kristiane”. Papa kujtoi pse është e nevojshme t’i drejtohemi edhe meshtarit
e të mos mjaftohemi me rrëfimin drejtpërdrejt me Zotin: “Ndokush mund
të thotë: ‘Unë rrëfehem vetëm me Zotin’. Po, mund t’i thuash Zotit: ‘Më fal, o Zot!’
e t’ia rrëfesh mëkatet tua. Por ne mëkatojmë edhe kundër vëllezërve, kundër Kishës,
e prandaj është e nevojshme t’i kërkojmë ndjesë edhe vëllezërve e edhe Kishës, duke
e bërë këtë përmes meshtarit”. Kur nisemi për t’u rrëfyer, edhe turpi është
ilaç për shpirtin: na mjekon e na shëron: “Edhe turpi është i mirë. Është
e shëndetshme të kesh pak turp. Turpi të bën mirë. Të kujton se duhet të jesh paksa
më i përvuajtur. Meshtari e ndjek me dashuri e butësi rrëfimin e, në emër të Zotit,
fal”. Nuk duhet pasur frikë, pra, nga rrëfimi: “Është gjë e bukur
të flasësh me vëllain e ta shkarkosh në shpirt të meshtarit barrën, që ke në zemër:
është shfrim para syve të Zotit, Kishës e vëllait. Ndonjeri, kur vihet në radhë për
t’u rrëfyer, i ndjen të gjitha këto shqetësime, edhe barrën e turpit, por pastaj,
kur përfundon rrëfimin, del nga rrëfyestorja i lirë, i madh, i bukur, i falur, i lum”. Në
vijim, Papa i drejtoi secilit një pyetje: “Që kur s’je rrëfyer? Që prej dy
ditësh? Dy javësh, njëzet vjetësh? Dyzet? Mos e humb më asnjë ditë të vetme: ec, shko
në rrëfyestore. Meshtari do të jetë i mirë me ty. Mos harro, atje është vetë Jezusi.
E Jezusi është më i mirë se priftërinjtë. Jezusi të pret. Me shumë dashuri. Zemër,
pra, shko e rrëfeju!”. Të kremtosh sakramentin e rrëfimit, pohoi në përfundim
Papa, do të thotë të ndjesh përqafimin e ngrohtë të mëshirës së pafundme të Atit qiellor:“Sa
herë që rrëfehemi, Zoti na rrok, Zoti është në festë!”.