Францішак пра каштоўнасць цярплівасці ў выпрабаваннях
Цярплівасць Божага
Народа, які з верай пераносіць штодзённыя выпрабаванні – гэта тое, што дазваляе Касцёлу
ісці наперад, сказаў папа Францішак падчас ранішняй Эўхарыстыі ў Доме св. Марты 17
лютага 2014 г. Каментуючы заклік святога апостала Якуба – “з вялікай радасцю ўспрымайце
тое, калі трапляеце ў разнастайныя выпрабаванні”, Пантыфік адзначыў, што цярплівасць
дапамагае сталець у жыцці. Тыя, хто не маюць “мудрасці цярплівасці” не растуць – яны
спяшаюцца, з’яўляюцца капрызнымі і лічаць сябе ўсемагутнымі – хочуць усяго і адразу,
як фарысеі, якія прасілі цудаў у Езуса, сказаў Папа. Пантыфік нагадаў, што Бог дзейнічае
іншым чынам – Ён перш за ўсё цярплівы. Францішак заклікаў жыць “пад музыку цярплівасці”
– “музыку нашых айцоў, Божага народа, тых, якія верылі ў Слова Божае, выконвалі запаведзь,
якую Пан даў нашаму айцу Абрагаму: “хадзі перад абліччам Маім і будзь беззаганы”.
Францішак
падкрэсліў, што Божы народ шмат пакутаваў, цярпеў пераследы, але меў радасць, якая
абапіралася на давер да абяцанняў Пана. “Гэта цярплівасць”, якую “мы павінны мець
у выпрабаваннях: цярплівасць сталых людзей, цярплівасць Бога”, які нясе нас на сваіх
плячах, сказаў Святы Айцец.
Паводле Папы, гэта ёсць таксама і сёння сярод Божага
народу: дастаткова ўбачыць з якой цярплівасцю многія вернікі пераносяць праблемы,
хваробы свае і сваіх дзяцей. Такія людзі не просяць у Бога асаблівых знакаў, але “здольныя
чытаць знакі часу”, не губляюць “радасці веры”, сваёй цярплівасцю і святасцю вядуць
Касцёл наперад, падкрэсліў Францішак.