Indi: në Mumbai qeveria kërkon shpronësimin e pjesshëm të një shtëpie të Nënë Terezës
Qeveria lokale e Mumbait dha njoftimin për shpronësimin e truallit të “Cardinal Gracias
Destitute’s Home” (Shtëpisë Kardinal Garcias për të varfërit) , ku strehohen të sëmurë
në prag të vdekjes, nën kujdesin e motrave të Nënë Terezës. Administrata kërkon të
marrë 3,5 m2 për zgjerimin e rrugës, gjë që, sipas saj, do ta lehtësonte
trafikun tepër të dendur në zonë. Por aktivistët dhe rregulltaret shpjegojnë se trafiku
has pengesa në zonën rreth stacionit, e jo pranë shtëpisë në fjalë. Në “Shtëpinë Kardinal
Gracias për të varfërit”, nënvizon për agjencinë AziaNjuz motra Praksi, Nëna eprore
e Motrave të Bamirësisë, themeluar nga Nënë Tereza, aktualisht jetojnë 70 gra. Nëse
shpronësohet trualli, duhet të rrënohet kapela, kushtuar Zojës së Bekuar dhe cisterna.
Gjithashtu duhen prerë tetë drurë. Do të ngushtohet edhe hyrja, ku kalon ambulanca.
Struktura i përket kishës së Zemrës së Krishtit. Që në vitin 1983, shpjegon në
AziaNjuz famullitari, atë Vernon Aguilar, kisha ka dhënë 58 m2 truall për
zgjerimin e rrugës. Në pikën, ku mendohet të bëhet shpronësimi, lartohet edhe një
kryq, i vendosur aty që prej 150 vjetësh. Imzot Nereus Rodrigues, një nga bashkëpunëtorët
e ngushtë të Nënë Terezës, në të kaluarën famullitar i kishës së Zemrës së Krishtit,
shpjegon për AziaNjuz vlerën që ka kjo shtëpi për qytetin e Mumbait: “Cardinal Gracias
Destitute’s Home” u përurua më 24 maj 1962, në festën e Zojës Ndihmëtare. Trualli
ku ngrihet, i është dhuruar Kishës, edhe sot e kësaj dite pronare e tij. Nënë Tereza
vinte ta vizitonte shpesh këtë shtëpi, me të cilën kishte lidhje të veçantë.