Յունաստանի մէջ գործազրկութեան մակարդակը հասած է մրցանշային ցուցանիշի։
Ռուսական «Քոմսոմոլսքայա Փրաւտա» օրաթերթը կը հաղորդէ, որ Յունաստանի կառավարութեան վիճակագրական
նոր զեկուցումին մէջ կ՛ըսուի, որ Յունաստանի գործազրկութեան մակարդակը հասած է մրցանշային
28 առ հարիւրի: Նախորդ «մրցանիշը» արձանագրուած էր 2013-ի օգոստոսին, երբ Յունաստանի
մէջ գործազրկութեան համեմատութիւնը հասած էր 27.6 առ հարիւրի: Համեմատութեան համար պէտք
է նշել, որ 2012-ի մայիսին այդ ցուցանիշը աւելի ցած էր` 23.8 առ հարիւր, իսկ վեց տարի
առաջ, այսինքն` տնտեսական ճգնաժամէն առաջ, գործազրկութիւնը չէր գերազանցեր 12 առ հարիւրը: Ըստ
տուեալներուն, 15-25 տարեկան յոյներու 61 առ հարիւրէն աւելին չի կրնար աշխատանք գտնել:
Այս պահուս ատիկա վատագոյն ցուցանիշն է Եւրոպական Միութեան բոլոր երկիրներուն շրջանակին
մէջ: Բայց եւ այնպէս, յունական իշխանութիւնները յոյս ունին արագ կերպով բարելաւելու
իրավիճակը: Կ՛ենթադրուի, որ յունական տնտեսութեան աճը 2014-ին պիտի կազմէ 0.6 առ հարիւր: