16 лютага 2014 г.
папа Францішак здзейніць візіт на перыферыю Рыма – у парафію св. Тамаша Аквінскага,
у раёне Інфернэта італьянскай сталіцы. Візіт прымеркаваны да 50-годдзя заснавання
гэтай парафіяльнай супольнасці. У яго рамках Святы Айцец сустрэнецца з дзецьмі, інвалідамі,
хворымі, паспавядае пяць вернікаў і ўзначаліць Эўхарыстыю ў новым касцёле, пабудаваным
нядаўна ў сувязі з павелічэннем колькасці парафіянаў. Мясцовы пробашч, кс. Антоніа
Д’Эрыка расказаў, што падрыхтоўка да візіту высокага госця падыходзіць да заканчэння,
а самая вялікая ўвага пры ёй надавалася духоўнаму аспекту. Святар назваў візіт Пантыфіка
вялікім дарам Божым і менавіта так заклікаў парафіян глядзець на яго – не як на медыйную
падзею. “Такім чынам малітва знаходзіцца ў цэнтры нашай сустрэчы з Папам. А кульмінацыяй
усяго візіту, будзе менавіта эўхарыстычная цэлебрацыя”, - падзяліўся ён.
Кс.
Д’Эрыка падкрэсліў: нягледзячы на тое, што парафія св. Тамаша з Аквіну знаходзіцца
на геаграфічнай перыферыі Рыма яе нельга назваць “перыферыяй” у пераносным значэнні
гэтага слова. Узровень жыцця большасці мясцовых жыхароў сярэдні і высокі. Але гэта
таксама стварае пэўнага кшталту праблемы. Першай сярод іх святар вылучыў спакусу самаізаляцыі
для многіх сем’яў – жаданне закрыцца ва ўласных дамах і нават не цікавіцца сваімі
бліжнімі.
Тым не менш з боку парафіян існуе вялікая ўвага да праблем бедных.
Каля 50-60 чалавек у тыдзень атрымліваюць дапамогу ў мясцовым “Caritas”, адна з парафіянак
знаходзіцца на місіі ў Конга – яна заснавала там школу для медсёстраў, а парафіяльная
супольнасць падтрымлівае яе дзейнасць матэрыяльна. Дзякуючы мясцовым вернікам быў
адкрыты таксама дзіцячы садок у Албаніі, пабудаваны касцёл у Кот-Д’Івуары і кожны
год збіраюцца ахвяры на патрэбы дзяцей у Бэтлееме. Парафіяльная супольнасць, якую
наведае Папа, працягвае дынамічна развівацца – кожны год тут атрымліваюць хрост каля
130 чалавек, падзяліўся яе пробашч.