«Ժընեւ-2»-ը տապալելու փորձեր կը կատարուին» ըսաւ Լաւրով
Ռուսիոյ արտաքին գործոց նախարար Սերկէյ Լաւրով յայտնեց, որ քիմիական զէնքի օգտագործման
պատրուակի ձախողութենէն ետք ոմանք ջանք կը թափեն Սուրիոյ մէջ մարդասիրական կացութիւնը
քաղաքականացնելու: Լաւրով Գերմանիոյ արտաքին գործոց նախարար Ֆրանք Շթայնմայըրի հետ
տրուած մամլոյ ասուլիսի մը ընթացքին ըսաւ, որ «գոյութիւն ունին ոմանք, որոնք կը փորձեն
Ժընեւի հաղորդագրութիւնը սուրիական վարչակարգը տապալելու իբրեւ նախաբան օգտագործել»`
նշելով, որ «սուրիական կառավարական պատուիրակութիւնը Ժընեւէն հեռանալ ստիպելու հաշիւներ
կրնան ըլլալ»: Ռուսական դիւանագիտութեան պետը ըսաւ, որ Սուրիոյ հարցով ՄԱԿ-ի եւ Արաբական
լիկայի յատուկ պատուիրակ Լախտար Իպրահիմի եւ ընդդիմադիր Ազգային համաձայնական մարմինի
նախագահ Ահմետ Ժարպա «մեզի խոստացան Ժընեւի մէջ ընդդիմութեան պատուիրակութիւնը ընդլայնել»: Լաւրով
յայտնեց, որ ժընեւեան բանակցութիւնները տապալելու փորձեր կը կատարուին: «Ատիկա զիս շատ
կ՛անհանգստացնէ` նախ եւ առաջ այն պատճառով, որ մենք կը տեսնենք քաղաքական լուծումը տապալելու
ուղղուած պատճառաբանութեան ծրագրաւորեալ փնտռտուք: Եւ, ի հարկէ, երբ Միացեալ Նահանգներու
եւ Ֆրանսայի նախագահները մամլոյ ասուլիսներու ժամանակ կ՛ըսեն, որ հաւանական է, որ խնդիրը
միայն բանակցութիւններով չաւարտի, ատիկա մեր մօտ անհանգստութիւն կը յառաջացնէ», ըսաւ
ան: Գերմանիոյ արտաքին գործոց նախարարը իր կարգին յոյս յայտնեց, որ Ժընեւի մէջ ընթացող
բանակցութիւնները յաջողին: Շթայնմայըր յայտարարեց, որ իր երկիրը որոշած է չմասնակցիլ
սուրիական քիմիական զէնքերու ոչնչացման` նշելով, որ կառավարութիւնը կը յուսայ այդ զէնքերու
փոխադրութեան գործողութեան մասնակցութեան համար գերմանական խորհրդարանի հաւանութիւնը
ստանալ: Ռուսիոյ արտաքին գործոց փոխնախարար Կենատի Կաթիլով երէկ վստահեցուց, որ «սուրիական
կառավարութիւնը «Ժընեւ-2»-ի բանակցութիւններէն հեռանալու ծրագիրներ չունի»` շեշտելով,
որ ժընեւեան բանակցութիւնները տակաւին անելի չեն մատնուած: Սուրիական ընդդիմադիր Ազգային
համաձայնական մարմինը երէկ յայտնեց, որ Իպրահիմի Ժընեւի մէջ բանակցութեանց 3-րդ փուլ
մը կը ծրագրէ, սակայն ատոր թուականը տակաւին չէ ճշդուած: