Святы Айцец нагадаў чэшскім біскупам пра выклікі для мясцовага Касцёла
Памножыць адпаведныя
душпастырскія ініцыятывы, накіраваныя на сумленную падрыхтоўку да сакрамэнтаў і да
актыўнага ўдзелу ў літургіі, і пашырыць прысутнасць у свеце адукацыі і культуры, заклікаў
Святы Айцец чэшскіх біскупаў. Ён лічыць, што ў Чэхіі патрэбны “канструктыўны дыялог
з усімі, нават тымі, хто далёкі ад любога рэлігійнага пачуцця”. 14 лютага 2014 г.
у Ватыкане адбылася сустрэча Пантыфіка з чэшскімі іерархамі ў рамках візіту “ad limina
Apostolorum”. Касцёл у гэтай краіне, звярнуў увагу Папа, стаіць перад выклікам дапамогі
асобам, якія апынуліся ў “цяжкіх умовах”. Ён заклікаў біскупаў “быць трывалымі ў малітве,
шчодрымі ў служэнні свайму народу, руплівымі ў абвяшчэнні Божага слова”. Святы Айцец
нагадаў пра абавязак іерархаў адносіцца з “бацькоўскай любоўю да святароў”, клапаціцца
пра пакліканні, развіваць душпастырства сем’яў. Чэшскае грамадства і СМІ, на думку
Пантыфіка, патрабуюць прысутнасці католікаў у сваім жыцці і дзейнасці.
Францішак
нагадаў, што “адзінства і салідарнасць паміж біскупамі” заўсёды грае вялікую ролю
ў дылогу з грамадзянскімі ўладамі, “як у звычайным жыцці, так і ў вырашэнні найбольш
далікатных праблем”. Ён заклікаў епіскапат у яго эканамічнай сферы распрацаваць сістэму,
абароненую і празрыстую, якая будзе гарантаваць, што матэрыяльныя сродкі будуць прызначаны
выключна для духоўнай місіі Касцёла.
Святы Айцец падзякаваў чэшскім біскупам
“за нястомную пастырскую працу” для Касцёла.