Երեկոյեան Հայ առաքելական եկեղեցիները կը վառեն Քրիստոսի լոյսը խորհրդանշող տեառընդառաջի
խարոյկները
40-օրական Յիսուս Քրիստոսի ընծայումը Տաճարին խորհրդանշող Տեառընդառաջի տօնին` Փետրուար
13-ի երեկոյեան, հայաստանեան առաքելական բոլոր եկեղեցիներուն մէջ կը վառին խարոյկներ:
Տեառնընդառաջը կամ ժողովրդական խօսքով առաւել կիրառուող Տրնտէզը Հայ Առաքելական Եկեղեցւոյ
անշարժ տօներէն է եւ կը նշուի ամէն տարի Քրիստոսի Սուրբ Ծննդեան եւ Աստուածայայտնութեան
տօնէն 40 օր ետք` Փետրուար 14-ին: Տօնի աստուածաշնչեան պատումին համաձայն, երբ կը լրանայ
մանուկ Յիսուսի սրբագործման 40 օրը, սուրբ Աստուածամայրը Յիսուսի հետ կը ներկայանայ Տաճար:
Այս մասին կը յիշատակէ Ղուկաս աւետարանիչը, որ ներկայացնելով Յիսուսի կեանքի այս դրուագը,
կը պատմէ նաեւ Սիմէոն ծերունիի մասին, որուն Սուրբ Հոգիէն հրամայուած էր մահ չտեսնել,
մինչեւ Տիրոջ Օծեալը տեսնելը: Սիմէոն ծերունին տեսնելով մանկանը` Տիրոջ ընդառաջ կ’երթայ,
այստեղէն ալ կը առաջանայ տօնին անուանումը` «Տիրոջ ընդառաջ»: Աւանդութեան համաձայն,
երբ տեղ կը հասնին, Աստծոյ հրամանով փակուած տաճարի արեւելեան դուռը դղրդիւնով կը բացուի,
ու մարդիկ ճրագներով դուրս կու գան տուներէն` տեսնելու թէ ինչ կը կատարուի եւ այդպիսով
ակամայ կը լուսաւորեն Յիսուսը: Աւանդութեան համաձայն` այստեղէն ալ յառաջացած է կրակներ
վառելու սովորոյթը: Եկեղեցական կանոնին համաձայն` Տեառնընդառաջի տօնը կը սկսի Փետրուար
13-ին երեկոյեան ժամերգութեամբ, որմէ ետք կը կատարուի նախատօնակ: Սովորաբար նախատօնակի
արարողութեան աւարտին կը կատարուի Անդաստանի արարողութիւն, որուն ընթացքին կ’օրհնուին
աշխարհի չորս ծագերը: Անդաստանին կը յաջորդէ մոմերու օրհնութեան արարողութիւնը: Եկեղեցւոյ
կանթեղներէն առնուած կրակով եկեղեցիներու բակերուն մէջ կը վառուին խարոյկներ, իբրեւ Քրիստոսի
լոյսի խորհրդանիշ: