Францішак заклікаў балгарскіх біскупаў будаваць Касцёл місіянераў
13 лютага 2014 г.
папа Францішак прыняў на аўдыенцыі групу біскупаў з Балгарыі, якія знаходзяцца ў Рыме
з візітам “ad limina Apostolorum”. Францішак выказаў падзяку за актыўную пазіцыю Касцёла
ў гэтай краіне, якім на працягу апошніх гадоў быў праведзены шэраг буйных мерапрыемстваў
навуковага і душпастырскага характару. Гэтыя ініцыятывы, на думку Святога Айца, пацвярджаюць,
што каталіцкая супольнасць, хоць і з’яўляецца меншасцю ў Балгарыі, сведчыць аб “натуральных
маральных каштоўнасцях і Евангеллі Хрыста”, у грамадстве, пазначаным шырокай духоўнай
пусткай, пакінутай у спадчыну атэістычным рэжымам, і “бескрытычным прыняццем культурных
мадэляў, у якіх дамінуюць прапановы практычнага матэрыялізму”. Папа заклікаў працягваіць
“з адвагай ісці гэтым шляхам”, спрабуючы здзейніць у Балгарыі “місійную перамену,
якую Касцёл пакліканы рэалізаваць ва ўсім свеце”. Гэта заданне, на яго думку, патрабуе
духоўнага і душпастрырскага навяртання, якое пачынаецца з асэнсавання таго, што ўсе
ахрышчаныя пакліканы быць місіянерамі. Місійнасць Касцёла, паводле Святога Айца, павінна
мець таксама сацыяльнае вымярэнне – прадугледжаваць клопат пра бедных, супольнае дабро
і грамадскі мір. Францішак адзначыў важнасць прызнання з боку дзяржавы ўкладу балгарскіх
католікаў у супольнае дабро і развіццё краіны.
Пантыфік заклікаў біскупаў
працягваць выхаванне вернікаў праз катэхізацыю, душпастрыства моладзі, спрыянне пакліканням
і “святарскаму братэрству”. Ён адзначыў таксама важнасць дыялога з Балгарскай Праваслаўнай
Царквой.
Між іншым, Папа нагадаў, што 27 красавіка 2014 г. адбудзецца кананізацыя
бл. Яна Паўла ІІ і бл. Яна ХХІІІ. Апошні, да абрання на Пасад св. Пятра, быў Апостальскім
дэлегатам у Балгарыі і, на думку Святога Айца, вельмі любіў народ гэтай краіны, які
ў “метамарфозах гісторыі захаваў жывым полымя веры ў Хрыста”.