Арцыбіскуп Паралін: канкардат з Італіяй – рэха ІІ Ватыканскага Сабору
Ватыканская дэлегацыя
на чале з Дзяржсакратаром Яго Святасці Папы арцыбіскупам Пьетра Паралінам прыняла
ўдзел у канферэнцыі, прысвечанай 30-годдзю абнаўлення канкардата паміж Апостальскай
Сталіцай і Італіяй. Форум праходзіў 12 лютага 2014 г. у Сенаце Італьянскай Рэспублікі,
дзе кіраўнік ватыканскай дыпламатыі выступіў з прамовай. Ён адзначыў, што тэкст пагаднення
з’яўляецца пэўным “рэхам” ІІ Ватыканскага Сабору. У першую чаргу, відавочнай з’яўляецца
сувязь некаторых яго пунктаў з саборнай Канстытуцыяй аб Касцёле ў сучасным свеце “Gaudium
et spes” (Радасць і надзея), у якой сцвярджаецца, што “палітычная супольнасць і Касцёл
у сваіх сферах незалежныя і аўтаномныя”; “яны, хоць і з розных матываў, служаць асабістаму
і грамадскаму пакліканню адных і тых жа людзей”; і “будуць тым больш эфектыўна выконваць
гэтае слуэнне дзеля дабра ўсіх, чым лепш будуць развіваць здаровае супрацоўніцтва,
улічваючы таксама абставіны месца і часу”.
Арцыбіскуп Паралін адзначыў, што
неабходнасць супрацоўніцтва паміж Касцёлам і дзяржавай, якая падкрэсліваецца з канкардаце,
з’яўляецца адлюстраваннем Сабору, які прадставіў Касцёл не ў якасці іерархіі ці інстытута,
але Божага народа, які пілігрымуе ў гісторыі – народа пакліканага натхняць грамадства
на дабро і справядлівасць, народа пакліканага выконваць “функцыю душы ў целе”.
Іерарх
падкрэсліў гістарычнае значэнне абноўленага пагаднення з Італіяй. Гэтым дакументам,
на яго думку, “канчаткова перагортвалася старонка канкардатаў мінулага”, якія Касцёл
заключаў з таталітарнымі або аўтарытарнымі дзяржавамі галоўным чынам з мэтай абароны
рэлігійнай свабоды. Новае пагадненне прадугледжвала сяброўства, адкрытасць, лаяльнасць
і двухбаковае супрацоўніцтва на карысць чалавека і дабра краіны. На думку арцыбіскупа
Параліна, адным з галоўных аспектаў гэтага супрацоўніцтва з’яўляецца перадача Касцёлам
і іншымі рэлігійнымі супольнасцямі базавых каштоўнасцяў, у якіх грамадства мае патрэбу.