Papa, ipeshkvijve bullgarë: Kisha duhet të jetë misionare e të dialogojë me ortodoksët
Popull që, edhe në mesin e ngjarjeve të hidhura të historisë, e ka mbajtur gjallë
flakën e fesë në Krishtin: këta janë bullgarët, në fjalët e Papës Françesku, i cili
priti sot ipeshkvijtë e vendit në vizitë “ad Limina”. Në fjalimin, të cilin ua dorëzoi
ipeshkvijve, Ati i Shenjtë përshkon etapat e historisë së Bullgarisë, duke e ftuar
Kishën të bëjë hapa përpara në dialogun me ortodoksët. Papa Françesku nuk harron
se Bullgaria, me rënien e komunizmit, u gjend para dy zjarresh, ashtu si gjithë Evropa
Lindore. Nga njëra anë, boshllëku shpirtëror lënë nga regjimi ateist e, nga ana tjetër,
sulmi materialist i botës perëndimore, e cila hynte furishëm në një tokë pothuaj djerrë,
e papërgatitur për shoshitjen e nevojshme para pseudovlerave, që i propozoheshin.
Katolikët janë pakicë në vend, vëren Ati i Shenjtë, por dëshmojnë me guxim Ungjillin
e Krishtit. Është e rëndësishme, nënvizon Papa Françesku, që të gjitha institucionet
civile ta vlerësojnë pozitivisht kontributin e Kishës Katolike dhe ta njohin rolin
e Selisë së Shenjtë si autoritet shpirtëror e moral në gjirin e Bashkësisë ndërkombëtare.
“Dëshmitë e shumta e të guximshme të besnikërisë ndaj Krishtit e Kishës në periudha
dramatike – shkruan Papa argjentinas – si edhe udha e ndërmarrë në këta dy dhjetëvjeçarë
të lirisë së rigjetur, t’ju mbushin me mirënjohje ndaj Zotit e me besim në veprimin
e Provanisë Hyjnore në histori”. Duke e ftuar Kishën Katolike t’i japë rëndësi
kryesore përmasës misionare të veprimtarisë së saj e të impenjohet me të gjitha forcat
në favor të të varfërve, Papa Françesku i këshillon ipeshkvijtë të punojnë me ngulm
për formimin e besimtarëve, përmes katekizmit, baritorisë për të rinjtë e solidaritetit
vëllazëror ndërmjet meshtarëve, shembull për t’u ndjekur, në sytë e Popullit të Zotit.
Pastaj, urimet për Patrikun ortodoks Neofit, i cili feston pas pak ditësh përvjetorin
e parë të zgjedhjes në detyrë. Me Kishën Ortodokse, shkruan Ati i Shenjtë, duhet të
jemi gjithnjë në dialog vëllazëror. “Duke e dëgjuar së bashku e në lutje Fjalën e
Zotit, uroj të hapen zemrat e mendjet e të gjithëve, që të bëhet gjithnjë e më konkrete
shpresa për të kremtuar bashkërisht Flijimin eukaristik”. Më 27 prill, kujton
Papa, do të shpallen shenjtorë Gjoni XXIII e Gjon Pali II, të dy të lidhur me historinë
e popullit bullgar. Papa Vojtila vizitoi vendin në maj të vitit 2002, ndërsa Papa
Ronkali pati shërbyer për nëntë vjet në Bullgari si Legat Apostolik. Ati i Shenjtë
shprehu kënaqësinë për praninë e delegacioneve bullgare të nivelit të lartë në meshën
e shenjtërimit, që do të kremtohet në Vatikan.