Më se 20 mijë të fejuar në Sheshin e Shën Pjetrit me Papën më 14 shkurt
Më se 20 mijë të fejuar pritet të vijnë në Sheshin e Shën Pjetrit, për audiencën me
Papën Françesku, organizuar nga Këshilli Papnor për Familjen. “Vijnë nga 28 vende
të botës – thotë një komunikatë e dikasterit – dhe do të martohen gjatë muajve të
ardhshëm”. “Suksesi numerik i kësaj nisme, krejtësisht i paparashikuar para tri javësh,
thotë kryetari i Këshillit Papnor, Imzot Vincenzo Paglia, tregon se ka të rinj, që
shkojnë kundër rrymës, të cilët dëshirojnë që dashuria e tyre të qëndrojë përgjithmonë
e të ketë bekimin e Hyjit, edhe pse bota në të cilën jetojnë nuk beson se lidhjet
janë të qëndrueshme në amshim dhe se është mirë që secili të mendojë për vete”. Audienca
do të fillojë në orën 11. Gjatë orës së parë, të fejuarit do të përgatiten për takimin
me Atin e Shenjtë, duke përshkuar fazat kryesore të historisë së një dashurie, me
anë të tregimeve, të këngëve dhe të poezive të dashurisë. Rreth orës 12 Papa Françesku
do të arrijë në shesh dhe do të bisedojë me tre çifte të fejuarish. Pyetje e të fejuarve
do të prekin vështirësitë e sotme për të marrë një vendim përfundimtar, cilësitë e
familjes së krishterë, stilin për kremtimin e sakramentit të martesës. “Sot –
vijon Imzot Paglia – vendimi për t’u martuar shtyhet vazhdimisht, në pritje të zgjidhjes
së përgjithshme të të gjitha problemeve. Në të vërtetë, martesa bëhet për të ndërtuar
së bashku të ardhmen, për të zgjidhur së bashku problemet, për të ndërtuar së bashku
shtëpinë, për vete e për fëmijët. Sigurisht, përgjegjësit e të mirës së përbashkët
duhet të jenë shumë më të vëmendshëm, për t’i ndihmuar dy të rinj, që të marrin vendimin
për t’u martuar, me anë të politikës së vëmendshme për familjen dhe punën, sepse një
familje e ndërtuar në rini është një pasuri e pakrahasueshme edhe për vetë shoqërinë”. Audienca
do të mbyllet me një çast lutjeje (është hartuar lutja e të fejuarve, pikërisht për
këtë ngjarje) dhe me bekimin e Papës. Të gjitha çifteve do t’u shpërndahet një dhuratë
e veçantë për kremtimin e martesës.