Член Рады кардыналаў: Папа не зменіць навучання Касцёла
Не трэба чакаць, што
папа Францішак пагодзіцца на ўдзяленне сакрамэнтаў тым разведзеным, якія жывуць у
новых саюзах, і здзейсніць нейкі пераварот у падыходзе Касцёла да кантрацэпцыі, гомасексуалізму
ці абортаў, сказаў у заяве для газеты “The Boston Globe” кардынал Шон О’Мэлі, які
ўваходзіць у склад 8-асабовай Рады кардыналаў для дапамогі Святому Айцу ў кіраванні
Касцёлам. “Касцёл павінен быць верным Евангеллю і вучэнню Хрыста”, - сказаў арцыбіскуп
Бостана. Ён адзначыў, што часам гэта вельмі цяжка, але тое, чаго патрабуе ад нас Пан,
з’яўляецца найлепшым.
Калі кардынала спыталі аб магчымасці ўдзялення сакрамэнтаў
разведзеным, якія жывуць у новых саюзах, ён сказаў, што не бачыць прычын, па якіх
трэба і можна было б паслабіць існуючыя правілы. З іншага боку, іерарх не бачыць ніякіх
перашкод для таго, каб у бліжэйшы час жанчына стаяла на чале нейкай ватыканскай дыкастэрыі.
Ён таксама перакананы, што можна працаваць над большай эфектыўнасцю касцёльных судоў,
якія вядуць працэсы па сцвярджэнні несапраўднасці сужэнства.