Tërheqja qe një “akt i madh guximi, por edhe një akt revolucionar, që hapi një mundësi,
për të cilën askush nuk mund mendonte në atë kohë”. Këto janë fjalët që i vijnë në
mendje sekretarit personal të Papës Benedikti XVI dhe prefektit të Shtëpisë Papnore,
Imzot Georg Gänswein, kur kujton njoftimin e dorëheqjes së Benediktit XVI, gjatë një
interviste me qendrën televizive të Vatikanit, që do të dalë e plotë më 14 shkurt. “11
shkurti qe një ditë shumë e veçantë. Pas njoftimit të tërheqjes përziheshin ndjenjat
e trishtimit me ato të mirënjohjes. Është e qartë se largimi është gjithmonë një gjë
e trishtueshme, që lëndon e dhemb. Nga ana tjetër, ndjeva mirënjohje për vitet gjatë
të cilëve pata mundësinë të jetoja përkrah një Papë të madh. Unë e dija që më parë
dhe, kjo është e kuptueshme, kur Papa ma tha, më urdhëroi të mos flisja me asnjeri
dhe unë nuk fola. Unë e dija, por në çastin kur e njoftoi ai, u përmallova. Për mua,
dita e fundit e papnimit të tij qe një ditë fort e dhimbshme”. Imzot Gänswein nënvizon
gjithashtu vijimësinë ndërmjet dy papnive. Sipas tij, forca emocionuese e papës Françesku
për besimtarët varet edhe nga gjesti i Benediktit XVI. “Unë besoj fort – thotë Imzot
Gänswein - se ky është një aspekt që nuk duhet nënvlerësuar. Ndikimi i Papës Françesku
në botë, jo vetëm tek besimtarët në Kishë, por në botë, është një ndikim shumë i madh,
i cili u mundësua nga dorëheqja e Benediktit XVI. Ai hapi një mundësi, që deri atëherë
nuk ekzistonte, dhe u pa se Papa Françesku e mori situatën në dorë. Sot jemi të kënaqur,
që gjërat rrodhën kështu”, përfundon prefekti i shtëpisë papnore.