Françesku: Lojrat Olimpike të Soçit janë festë e sportit dhe e miqësisë; të krishterët
të jetojnë si “llambë e ndezur” në botë
Lojrat Olimpike dimërore të Soçit janë “festë e sportit dhe e miqësisë”. Kështu u
shpreh Papa Françesku në lutjen e sotme të Engjëllit të Tënzot, kremtuar në Sheshin
e Shën Pjetrit. Një mendim i posaçëm i Papës, ishte ai drejtuar të sëmurëve, në prag
të 11 shkurtit, Ditë, që u kushtohet. Papa i ftoi gjithë të krishterët t’i japin shije
mjediseve të ndryshme, në të cilat jetojnë. U kujtoi se duhet të jenë “llamba të ndezura”
në botë, me dëshminë e tyre.
Në Engjëllin e Tënzot, një urim i posaçëm drejtuar
Lojrave Olimpike, që vijojnë në Soçi të Rusisë. Urim për ata, që e organizuan ngjarjen
e madhe, si dhe për protagonistët e disiplinave të ndryshme sportive: “Këto
ditë, në Soçi të Rusisë, zhvillohen Lojrat Olimpike Dimërore. Do të dëshiroja të arrinte
atje përshëndetja ime drejtuar organizatorëve dhe të gjithë sportistëve, me urimin
që të jetë festë e vërtetë sporti e miqësie”. Para se të kujtonte Lojrat
Olimpike, duke komentuar Ungjillin, Papa nënvizoi se edhe ne, si dishepujt, që ndiqnin
pas Krishtin, duhet të jemi “kripë e tokës” e “dritë e botës”. E kjo, vijoi, do të
bëhet e mundur, nëse do të jemi “të varfër në shpirt, me zemër të butë, të pastër,
të mëshirshme”. Të krishterët “Izraeli i ri”, vijoi Papa, marrin nga Krishti një mision:
“Ta orientojnë, ta shenjtërojnë, ta bëjnë pjellor njerëzimin: “Të
gjithë ne, të pagëzuarit, jemi dishepuj misionarë e edhe të thirrur të bëhemi në botë
ungjill i gjallë: me një jetë të shenjtë, do t’i japim ‘shije’ mjediseve të ndryshme
e do t’i mbrojmë nga prishja, siç bën kripa; e do të çojmë dritën e Krishtit me
dëshminë e dashurisë së vërtetë. Po nëse ne, të krishterët, humbasim shijen e shuajmë
dritën, kemi humbur e kemi shuar edhe dëshminë tonë”. I krishteri, vijoi
Papa, duhet të jetë njeri i dritshëm, që çon dritë, që jep dritë! Dritë, vërejti,
që nuk është e tija. Është dhuratë e Zotit, dhuratë e Jezusit. Më pas, një pyetje,
drejtuar turmës në Shesh: “Po unë tani dëshiroj t’ju pyes, ju si doni të
jetoni? Si llambë e ndezur, a si llambë e shuar? E ndezur, apo e shuar?
Si dëshironi të jetoni? Po nuk dëgjohet mirë këtu! Si? Llambë e ndezur, e? Është pikërisht
Zoti, që na e jep këtë dritë, e ne pastaj ua japin të tjerëve. Llambë e ndezur! Kjo
është thirrja e krishterë!”. Papa kujtoi se më 11 shkurt Kisha kremton
Ditën Botërore të të Sëmurit, në përkujtimin liturgjik të Zojës Lurdë. Rast i përshtatshëm,
pohoi, për t’i vënë të sëmurët në qendër të vëmendjes së bashkësisë, për t’u lutur
për ta e me ta, për të qenë gjithnjë pranë tyre. Posaçërisht, shtoi, mund të ndjekim
shembullin e Jezusit në sjelljen ndaj të sëmurëve të të gjitha llojeve: Jezusi kujdeset
për të gjithë, ndan me ta vuajtjen e ua mbush zemrën me shpresë. Më pas Ati i Shenjtë
kujtoi edhe punonjësit e shëndetësisë që, theksoi, bëjnë një punë vërtet me vlerë.
Ata, shtoi, duke u takuar çdo ditë me të sëmurët, nuk shikojnë vetëm trupa të ligështuar,
por njerëz, të cilëve u duhet kushtuar vëmendja e duhur, për t’u dhënë edhe përgjigjet
e duhura: “Dinjiteti i njeriut nuk rrëgjohet kurrë në fuqitë a në
aftësitë e tij, e nuk mungon, kur njeriu është i ligshtë, i paaftë për punë, nevojtar
për ndihmë. Mendoj edhe për familjet, ku kujdesi për të sëmurin është normal; por
nganjëherë situatat bëhen tejet të rënda…Shumë më shkruajnë, e sot dua t’i siguroj
se lutem për gjithë këto familje, e u them: mos kini frikë nga brishtësia! Ndihmojeni
njëri-tjetrin me dashuri e do ta ndjeni praninë ngushëlluese të Zotit”. Sjellja
bujare e të krishterit ndaj të sëmurëve, pohoi Papa, është kripë e tokës e dritë e
botës. E, më pas, iu lut Virgjërës Mari të na ndihmojë ta praktikojmë e të nxjerrë
nga Zoti hirin e paqes për gjithë të vuajturit. Në çastin e përshëndetjeve drejtuar
shtegtarëve, Papa Françesku kujtoi posaçërisht ata, që po kalojnë çaste të vështira
për shkak të kohës së keqe: “Lutem për të gjithë ata, që pësojnë dëme e shqetësime
për shkak të fatkeqësive natyrore në vende të ndryshme, e edhe këtu, në Romë; jam
shumë pranë tyre. Natyra na sfidon duke kërkuar të jemi solidarë e të vëmendshëm në
ruajtjen e gjithësisë, edhe duke i parandaluar, përsa të jetë e mundur, pasojat më
të rënda”.