Քրիստոսի պատուէրը
ուսուցանելու չէ վերապահուած միայն Սրբազան Քահանայապետին, եպիսկոպոսներուն, կղերականներուն
կամ կրօնաւոր-կրօնաւորուհիներուն, այլ ուղղուած է նաեւ անոնց, որոնք գիտեն եւ ունին վարդապետութիւնը,
որոնք պաշտօնով եւ վիճակով ստանձնած են այդ նուիրական պարտականութիւնը, այսինքն` ծնողները: Յատուկ
պարտականութիւնն է ծնողներուն, որոնք ոչ թէ միայն պատուէրն ունին ուսուցանելու, այլ նաեւ
առիթն ու միջոցները, եւ ոեւէ ուսուցիչէ աւելի պարտականութիւն ունին սորվեցնելու: Դպրոցին
մէջ ուսուցիչը կը սովորեցնէ եւ կը դաստիարակէ, իսկ հայրն ու մայրը, ապրելով երեխային
հետ, հաղորդակից ըլլալով բազմաթիւ կենսապայմաններուն` զաւակներու վրայ ներգործելու աւելի
լայն հնարաւորութիւն ունին: Բոլոր ուսուցիչները պարզապէս կրնան գործել իբր օգնական ծնողքին,
իբր անոնց գործակատարներ, ներկայացուցիչներ` աշխարհիկ, կրօնական եւ բարոյական դաստիարակութեան
մարզերուն վրայ: Ծնողքին սէրը հանդէկ իրենց երեխաներուն, տղոց վստահութիւնը հանդէպ
իրենց ծնողքին, անոնց յարատեւ միութիւնը էական են իւրաքանչիւր դաստիարակութեան մը մէջ:
Ծնողները պարտին ըլլալ բարի օրինակ, որպէսզի զաւակները իրենց նմանութեան ճիգը հաստատեն
բարի եւ դրական արժանիքներու վրայ: Ծնողներուն դասիարակութիւնը պէտք է բովանդակէ
եւ ընդգրկէ կեանքի բոլոր փուլերը` իմացական, բարոյական եւ հոգեկան բոլոր կարողութիւնները`
մանուկին, պատանիին եւ երիտասարդին: Մէկ խօսքով, զաւակները սահմանուած են գերերկրային
կեանքի մը. ճշմարիտ դաստիարակութիւնը պարտի զարգացնել կազմաւորումը մարդկային անձին`
անոր գերագոյն նպատակին լոյսին տակ»: Պարտականութիւնը ծնողներուն, իրենց զաւակները
դաստիարակելու մէջ, կը հետեւի այն իրողութեան թէ անոնք ազատ կամքով գործակիցներ եղան
Աստուծոյ, կեանք տալով նոր արարածներու: Կեանքի պարգեւը տալով զաւակներուն, անոնց է նաեւ
պարտականութիւնը սորվեցնելու, ինչ որ անհրաժեշտ է, որպէսզի անոնք վարեն կատարեալ մարդկային
կեանք մը: Խօսքով եւ գործով կը հաղորդեն իրենց զաւակներուն, ինչ որ անհրաժեշտ է գիտնալ
ներդաշնակ զարգացման համար ֆիզիքական եւ իմացական կեանքին, որպէսզի հասնին հոգեւոր հասունութեան: Ընտանեկան
դաստիարակութեան յաջողութիւնն ապահովող առաջին պայմանը ուրեմն համերաշխ ընտանիքի ներդաշնակութիւնն
է: Ընտանիքի մէջ լաւ փոխյարաբերութիւններու, առողջ մթնոլորտի ներդաշնակութեան դեպքին
մէջ կ՛աճին հանգիստ, հավասարակշռուած, եռանդուն ու կենսուրախ մարդիկ: Երեխայի դաստիարակութեան
հարցով մեծ նշանակութիւն ունին ծնողներու փոխյարաբերութիւնները երեխաներու հետ: Որեւէ
դաստիարակութեան մէջ առաջնակարգ տեղ ունին խստութեան եւ քնքշութեան չափերը: Կարելի չէ
անընդհատ սիրել երեխային, անընդհատ գովասանքի արժանացնել, խրախուսել, կատարել անոր բոլոր
պահանքջները կամ ընդհակառակը, երեխային անընդհատ պարսավանքի ենթարկել, պատժել եւ այլն:
Այս բոլորը պէտք է ըլլան չափաւորուած ու դուրս չգան անհրաժեշտութեան սահմաններէն: