Պէյրութի մէջ. Պոնինօ քննարկեց Լիբանանեան բանակին օժանդակութեան նպատակով Հռոմի խորհրդաժողովին
նախապատրաստութիւնները
Իտալիոյ արտաքին գործոց նախարար Էմմա Պոնինօ երէկ պաշտօնական այցելութեամբ մը ժամանեց
Պէյրութ: Հանրապետութեան նախագահ զօր. Միշել Սլէյման նախագահական պալատին մէջ ընդունեց
Պոնինոն եւ անոր ընկերակցող իտալական պատուիրակութիւնը, որոնց հետ քննարկեց երկկողմանի
յարաբերութիւնները, ինչպէս նաեւ փոխադարձ գործակցութիւնը: Հանդիպումին ընթացքին քննարկուեցան
նաեւ լիբանանեան բանակին օժանդակութեան նպատակով Հռոմի մէջ տեղի ունենալիք խորհրդաժողովին
նախապատրաստութիւնները: Պոնինօ շեշտեց, որ Իտալիա պիտի համադրէ լիբանանեան բանակին
տրամադրուելիք բոլոր նուիրատու երկիրներուն օժանդակութիւնները` շեշտելով, որ Իտալիա մնայուն
կերպով կը զօրակցի Լիբանանին եւ անոր կը ներկայացնէ քաղաքական, տնտեսական եւ զինուորական
աջակցութիւն: Նախագահ Սլէյման ընդգծեց ՖԻՆԻՒԼ-ի միջազգային խաղաղապահ ուժերուն մէջ
իտալական զօրամասին դերակատարութիւնը` աւելցնելով, որ այդ դերակատարութիւնը պիտի շարունակուի: Նախագահ
Սլէյման ողջունեց Պոնինոն եւ շնորհակալութիւն յայտնեց Իտալիոյ` Լիբանանի նկատմամբ անոր
ցուցաբերած մնայուն զօրակցութեան համար: Նախագահ Սլէյման շեշտեց բանակին կատարուելիք
օժանդակութեան յատուկ խորհրդաժողովին կարեւորութիւնը` դրուատելով ՖԻՆԻՒԼ-ի իտալական ջոկատին
առաքելութիւնը: