Сёлетняя серыя сустрэч
у рамках ватыканскай ініцыятывы “Падворак язычнікаў”, мэтай якой з’яўляецца дыялог
вернікаў з няверуючымі, была адкрыта кардыналам Джанфранка Равазі ў Будапешце 4 лютага
2014 г. Да гэтага апошняе такога роду спатканне прайшло ў лістападзе 2013 г. у Берліне.
Венгерскі форум, які працягнецца да чацвярга, прысвечаны пытанням маралі, эканомікі
і секулярнага грамадства ў ХХІ стагоддзі. Удзельнікі абмяркоўваюць праблемы сучасных
медыя, тэхналагічнага грамадства і ролю каталіцкага сацыяльнага навучання ў пераадоленні
эканамічнага крызісу. У дэбатах прымае ўдзел старшыня венгерскага епіскапату, кардынал
Петэр Эрдо.
Сустрэчы форуму “Падворак язычнікаў” праходзяць з мая 2011 г. у
розных еўрапейскіх гарадах. Галоўная мэта ініцыятывы – уключыць вернікаў і няверуючых
у дыялог. Натхняльнікам праекту стаў Бэнэдыкт XVI, які ў 2009 г. заявіў, што Каталіцкаму
Касцёлу трэба “нешта накшталт Падворка язычнікаў”, які існаваў пры Ерузалемскім Храме
і з’яўляўся самым першым узроўнем набліжэння да Бога.
Форумы ў рамках ініцыятывы
прайшлі ўжо ў Фларэнцыі, Асізі, Тыране, Барселоне, Бухарэсце, Стакгольме і нядаўна
ў Берліне.