Përkujtimi i Shenjtores Agata. Papa, të rinjve: ju ndihmoftë ta kuptoni rëndësinë
e pastrisë e të virgjërisë
Në përfundim të audiencës së përgjithshme, Papa kujtoi se Kisha kremton sot festën
liturgjike të Shën Agatës, apo Ages. Ja edhe fjalët e Françeskut: “Sot
kremtojmë festën e Shën Agatës, virgjër e martire. Virtyti i saj heroik ju nxitët
ju, të dashur të rinj, posaçërisht studentë të Shkollave të Kongregatës së Shën Gjon
Pagëzuesit, të ecni në gjurmët e saj. Ju ndihmoftë, sidomos, ta kuptoni rëndësinë
e pastrisë e të virgjërisë; ju ndihmoftë ju, të dashur të sëmurë,
ta pranoni kryqin, në bashkim shpirtëror me Zemrën e Krishtit; e
ju nxitët ju, të dashur bashkëshortë të rinj, ta kuptoni rolin e gruas në jetën tuaj
familjare”. Liturgjia e Orëve na propozon sot këtë tekst të ofices së Leximeve
kushtuar Shën Agatës, që pësoi martirizimin, ndoshta, në Katanie, në kohën e perandorit
romak Decio, sipas traditës, më 5 shkurt të vitit 251. “Fjalë kushtuar Shën
Agatës”, nga Shën Metodit Sikulo, ipeshkëv: “Përkujtimi i përvitshëm i Shën
Agatës na mblodhi, që të nderojmë një martire. I përket sa lashtësisë, aq edhe ditëve
tona. Na duket sikur ajo e vijon luftën, e vijon edhe ta fitojë. Për ditë! Ditë për
ditë kurorëzohet e zbukurohet me dhanti të reja hiri hyjnor. Shën Agata lindi
nga Fjala e Zotit të pamort e nga Biri i Tij i vetëm, i vdekur si njeri për ne. Thotë
Shën Gjoni: “Atyre, që e pranuan, u dha forcën të bëhen bij të Hyjit” (Gjn1,12).
Agata, shenjtorja jonë, që na ftoi sot në gostinë fetare, është nusja e Krishtit.
Është virgjëra, që i skuqi buzët me gjakun e Qengjit dhe e ushqeu shpirtin me vdekjen
e të dashurit të saj hyjnor. Stola e shenjtores sonë ka ngjyrën e gjakut të Krishtit,
por edhe atë të virgjërisë. Dëshmi, kjo, për të gjitha breznitë. Shenjtorja është
e mirë sepse, duke i përkitur Zotit, mbetet gjithnjë përkrah Dhëndrit të saj, për
të na bërë të gjithë pjesëtarë të pasurisë, të cilën ajo e ka në emër: Agata do të
thotë “e Mirë”, e kjo e mirë na u dhurua nga vetë burimi i mirësisë, Zoti. Mirësia
e Ages përkon sa me emrin, aq me realitetin e jetës e të fundit të Virgjërës. Agata,
e cila për dëshminë e madhërishme mbart një emër të lumnueshëm, na bën t’i shikojmë
gjestet e kryera prej saj e na tërheq deri me emrin, sepse na nxit të gjithëve, me
shembull, të hyjmë në garë për të fituar të mirën e vërtetë, që është Zoti”.