P. Kovalçik, për 20-vjetorin e Katekizmit të Kishës Katolike: U ngjit në qiell, rri
në të djathtë të Atit
Të gjitha të vërtetat e fesë së krishterë e kanë themelin e tyre në Ngjalljen e Krishtit:
për këtë temë folëm në emisionin e kaluar, duke shfletuar Katekizmin e Kishës Katolike
në faqet kushtuar Misterit të Ngjalljes. E ky Mister pasohet nga Misteri tjetër: “U
ngjit në qiell, rri në të djathtë të Atit”. Kështu titullohet edhe reflektimi
i 30-të i jezuitit atë Dariush Kovalçik, në 20 vjetorin e botimit të tekstit:
Fraza
e parafundit e Ungjillit të Markut, është: “Zoti Jezus, mbasi foli me ta, u ngjit
në qiell dhe rri në të djathtë të Atit”(16,19). Të Ngjiturit e Krishtit në
qiell, shpjegon Katekizmi, shënon kalimin nga lumnia e Krishtit të ngjallur, në atë
të Krishtit lartuar më të djathtën e Atit (KKK, 660). Mund të themi se të ngjiturit
në qiell është episodi i fundmë i jetës tokësore të Jezusit. Por ky episod kryhet
përtej horizontit tonë kohor e çon në amshimin e Atit. Të Ngjiturit lidhet ngushtë
me të zbriturit e Birit nga qielli. “Askush nuk u ngjit kurrë në qiell, përveç Birit
të njeriut, që zbriti nga qielli” (Gjn 3,13), pohon Shën Gjoni Ungjilltar.
Po, ç’ kuptim ka lëvizja nga qielli, e në qiell? Pse Vetja e dytë e Trinisë zbret,
e poshtëron vetveten, e pastaj rikthehet në lavdinë, të cilën e ka gëzuar gjithnjë?
Duhet vërejtur se në këtë lëvizje, natyra hyjnore bëhet përfundimisht një gjë e vetme
me natyrën njerëzore. Biri nuk kthehet tek Ati i vetëm, por dhe me natyrën e vet njerëzore.
Jezusi, Zot i vërtetë, nuk pushon së qeni edhe njeri i vërtetë. Mbetet i mishëruar
– me natyrë njerëzore të lumnuar. Katekizmi shpjegon: “I lënë në mëshirën e forcave
natyrore, njerëzimi nuk mund të hyjë në Shtëpinë e Atit. Vetëm Krishti mundi t’ia
hapë njeriut këtë portë...” (n. 661). Në lutjen e ofices së Solemnitetit të
të Ngjiturit të Krishtit në Qiell, lexojmë: “O Hyj, në Krishtin e ngjitur në qiell,
natyra jonë njerëzore u lartua pranë Teje”. Jezu Krishti na paraprin në Mbretërinë
e lavdishme të Atit (cfr KKK,667).Formula “rri në të djathtën e Atit” do të
thotë se Biri është përsosurisht i ngjashëm me Atin në natyrën e tij hyjnore e se
formon një natyrë të vetme hyjnore me Të. Biri, Hyj i vërtetë e njeri i vërtetë, bëhet
fjalëmirë për ne, si i vetmi ndërmjetësues. Mund të shpresojmë, prandaj, se një ditë
do të jemi bashkë me Të, në amshim” (KKK,667).