Անձնասպանական երկու յարձակումներ կը հարուածեն Լիբանանը
ՊԷՅՐՈՒԹ, «Ռոյթըրզ».- Երկուշաբթի, Փետրուար 3ին, հարաւային Պէյրութի Շուէյֆեթ շրջանին
մէջ, իր վրայ զետեղուած ռումբերը պայթեցնելով՝ անձնասպանութեան դիմած զինեալը եւ այլ
քաղաքային մը սպաննուած են: Կը կարծուի, թէ յարձակումին իսկական թիրախը դարձեալ եղած
է Պէյրութի հարաւային արուարձանները, որ «Հըզպալլա»ի միջնաբերդը կը նկատուի, սակայն ռումբերը
կանխահաս պայթած են: Պէյրութի հարաւային արուարձաններուն մէջ, Յուլիսէն ի վեր, չորս անձնասպանական
յարձակումներ տեղի ունեցած են՝ տասնեակներով զոհեր խլելով: Միւս կողմէ, Շաբաթ երեկոյեան
ուժգին պայթում մը ցնցեց Հերմելը: Պայթումը հետեւանք էր անձնասպանական գործողութեան մը
եւ անոր պատճառով արձանագրուեցաւ չորս զոհ եւ 28 վիրաւոր: Պայթումը տեղի ունեցաւ վառելանիւթի
կայանի մը մէջ, սակայն հրշէջները կրցան հակակշիռի տակ առնել հրդեհը եւ կանխարգիլել աւելի
մեծ աղէտ մը: Անձնասպանական այս գործողութեան պատասխանատուութիւնը ստանձնեց Սուրիոյ մէջ
կառավարութեան դէմ կռուող «Ճապհաթ Նուսրա» ծայրայեղ իսլամականներու խմբակը, որ իր հաղորդագրութեան
մէջ նշեց, թէ «ամօ՛թ է «Հըզպալլա»ին, որ երկրորդ անգամ ըլլալով թիրախ դարձաւ նման գործողութեան
մը՝ փաստելով իր տկարութիւնը»: Լիբանանի իշխանութիւնները, Լիբանանի մօտ Միացեալ Նահանգներու
եւ Բրիտանիոյ դեսպանատուները ու ՄԱԿի ընդհանուր քարտուղար Պան Քի Մուն խստիւ դատապարտեցին
Հերմելի պայթումը եւ ցաւակցութիւն յայտնեցին զոհերու հարազատներուն: