Անձնասպանական երկրորդ գործողութիւն մը կը հարուածէ Հերմելը
Շաբաթ երեկոյեան ժամը շուրջ 6:15-ին, ուժգին պայթում մը ցնցեց Հերմելը, երբ ականուած
ինքնաշարժ մը մուտք գործեց «Այթամ» պենզինի կայանը եւ հոն պայթեցաւ: Պայթումը հետեւանք
էր անձնասպանական գործողութեան, որուն պատճառով արձանագրուեցաւ չորս զոհ եւ վիրաւորուեցան
աւելի քան 28 ուրիշներ: Արձանագրուած զոհերն են` Ալի Ալլաու, Իպթիսամ Մուսաուի, Իսամ
Խէյրէտտին եւ Հասան Թահա, իսկ վիրաւորներուն մեծ մասը բաւական ծանր վիճակի մէջ կը գտնուին`
նկատի ունենալով, որ արձանագրուած են այրուածքի լուրջ պարագաներ, որոնք փոխադրուած են
Պէյրութի Ժեհթաուի հիւանդանոց: Մնացեալ բոլոր վիրաւորները փոխադրուած են Ասիի, Պաթուլի
եւ Ռայեաքի հիւանդանոցները: Այս պայթումին պարագային մտավախութիւնը այն էր, որ պայթումին
պատճառով հրկիզուէին նաեւ պենզինի կայանին պատկանող վառելանիւթի շտեմարանները, սակայն
հրշէջները կրցած էին հակակշիռի տակ առնել հրդեհը եւ կանխարգիլել աւելի հսկայ փորձանք
մը: Բանակը, քաղաքացիական պաշտպանութեան եւ ներքին ապահովութեան ուժերը փութացին դէպքին
վայրը, ուր անոնք կատարեցին փրկարար աշխատանքներ, ինչպէս նաեւ շրջափակեցին պայթումին
վայրը, որպէսզի քրէական ոստիկանութեան փաստահաւաքները կատարեն իրենց աշխատանքը: Զինուորական
ատեանին մօտ կառավարութեան ներկայացուցիչ դատախազ Սաքըր Սաքըրի հրահանգով դէպքին շուրջ
հետաքննութիւն բացուեցաւ: Ըստ լիբանանեան բանակին տուեալներուն, ականուած ինքնաշարժը
կը պարունակէր 25-30 քիլոկրամ պայթուցիկ նիւթ, ինչպէս նաեւ հրթիռներ եւ ձեռնառումբեր: