Շաբաթ 1 Փետրուար 2014-ին, նախատօնակ է Տեառնընդառաջի, Զմմառու Վանքի Եկեղեցւոյ մէջ Երեկոյեան
Ժամերգութիւն կը կատարուի, մասնակցութեամբ վանքիս Վարչական Հայրերուն և Դպրեվանքի ուսանողութեան:
Հինաւուրց աւանդութեան համաձայն, Ժամերգութեան աւարտին՝ եկեղեցւոյ գաւիթին մէջ խարոյկ
կը վառեն և անդաստան կը կատարեն կրակին շուրջ: Ըստ Հայ Եկեղեցւոյ տօնացոյցին, Կիրակի
2 Փետրուարը Տեառնընդառաջ է. այսինքն՝ «Գալուստն՝ Աստուածորդւոյն քառասնօրեայ ի տաճարն»:
Ան յիշատակն է քառասնօրեայ Քրիստոսի ընծայման տաճարին, երբ Սիմէոն Ծերունին և Աննա մարգարէուհին
դիմաւորեցին Յիսուս Մանուկը (Ղկ 2,21-38), և Սիմէոն Ծերունին, Մանուկ Յիսուսին ուղղելով
իր խօսքը կ'ըսէ. «Լոյս որ կը յայտնուի բոլոր հեթանոսներուն»: Եկեղեցին կը գովերգէ Քրիստոսի
աշխարհ բերած լոյսը: Այս տօնին առընչուած է նաեւ հայկական հեթանոսական շրջանէն մնացած
հրավառութեան աւանդութիւնը: Կիրակի առաւօտեան ժամը 8:00-ին և 10:30-ին, Սուրբ և Անմահ
Պատարագներուն ընթացքին կը կատարուի մոմեղինաց օրհնութիւն: