Аўстрыйскі кардынал пасля “ad limina”: стыль Францішка будзе ўзорам для нас
“Дарожнай картай”
для аднаўлення місіі Касцёла ў Аўстрыі назваў кардынал Крыстаф Шонборн пасланне папы
Францішка да мясцовых біскупаў, прымеркаваны да візіту “ad limina Apostolorum”. Пантыфік
выказаў вельмі рэалістычны погляд на становішча Касцёла ў краіне. Ён назваў недахопы,
а таксама сферы, дзе адбываюцца станоўчыя працэсы: дабрачыннасць, касцёльная адукацыя,
ахова здароўя. На думку арцыбіскупа Венскага, іерархам важна было пачуць, што Касцёл
павінен выходзіць да людзей, быць бліжэй да народа. Менавіта гэта дапаможа запабегчы
зыходу з Касцёла шматлікіх вернікаў, што назіраецца зараз у Аўстрыі.
Кардынал
Шонборн распавёў агенцтву “Kathpress” пра сітуацыю, якую ён сам назіраў, калі Папа
падсеў да ватыканскіх прыбіральшчыць, якія вячэралі, каб ім не прыйшлося есці ў адзіночку.
Так Францішак адносіцца да людзей у паўсядзённым жыцці, і жадае, каб Касцёл у Аўстрыі
ішоў падобным шляхам, сказаў іерарх.
Уразіў аўстрыйскага кардынала і сам
стыль паслання Папы да біскупаў. Там бачны пошук дыялогу, “яго камунікатыўны стыль
будзе ўзорам для нас біскупаў”, сказаў старшыня Канферэнцыі Біскупаў і дадаў, што
Францішак устанавіў планку для Касцёла ў Аўстрыі вельмі высока, “але гэта вельмі добра”.
Пасля
некалькіх дзён прабывання ў Ватыкане кардынал Шонборн сцвердзіў, што: “Рэформа Касцёла
ўжо ідзе. Але яна адбываецца праз Евангелле і людзей, якія жывуць паводле Евангелля
і выпраменьваюць яго радасць. Таму, гэта аднаўленне ўжо зараз адчуваецца”.