Ժընեւի մէջ. Սուրիոյ կառավարական եւ ընդդիմադիր պատուիրակութեանց Իպրահիմիի հետ ունենալիք
գիշերային հանդիպումները ջնջուեցան
Ժընեւի մէջ ՄԱԿ-ի կեդրոնատեղիէն աղբիւր մը ԻԹԱՐ-ԹԱՍՍ լրատու գործակալութեան յայտնեց,
որ Սուրիոյ հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմիի Սուրիոյ
կառավարական եւ ընդդիմադիր պատուիրակութեանց հետ երէկ երեկոյեան նախատեսուած հանդիպումները
ջնջուած են: ՄԱԿ-ի ընդհանուր Քարտուղար Պան Քի Մուն նախապէս յայտնած էր, որ Ժընեւի
բանակցութիւնները յառաջխաղացք արձանագրած են` վստահեցնելով, որ բանակցութեանց առաջին
փուլը պիտի աւարտի այսօր: «Նաշրա» կայքէջը հաղորդեց, որ Սուրիոյ կառավարական պատուիրակութիւնը
ներկայացուցած է ահաբեկչութեան դէմ պայքարի հաղորդագրութեան նախագիծ մը, որ հիմնուած
է «Ժընեւ-1»-ի հաղորդագրութեան վրայ, սակայն ընդդիմադիր պատուիրակութիւնը զայն մերժած
է: Նախագիծը հիմնուած է ՄԱԿ-ի Ապահովութեան խորհուրդը թիւ 1373 եւ 1267 որոշումներուն
վրայ, որոնք ահաբեկչութեան դէմ պայքարին համար միջազգային համագործակցութեան եւ ահաբեկչութեան
բոլոր ձեւերով դէմ դնելու կարեւորութիւնը կը շեշտեն: Կառավարական պատուիրակութեան
ներկայացուցած բանաձեւը նաեւ ահաբեկիչներու զէնքի մատակարարումն ու ֆինանսաւորումը դադրեցնելու
աշխատանք տանելու կոչ կ՛ուղղէ: Կառավարական պատուիրակութիւնը յայտնեց, որ ահաբեկչութեան
դէմ պայքարի հաղորդագրութեան մերժումը յստակ փաստ մըն է, որ ընդդիմութիւնը ահաբեկչութեան
կը զօրակցի եւ սուրիացի ժողովուրդի ձգտումներուն հակառակ կ՛ընթանայ: Իպրահիմի մամլոյ
ասուլիսի մը ընթացքին յայտնեց, որ «վաղը առաւօտեան մեր վերջին նիստը պիտի ըլլայ»` աւելցնելով,
որ «յառաջիկայ նիստերուն հետագային պիտի պատրաստուինք»: Ան նշեց, որ երէկուան նիստին
ընթացքին երկու պատուիրակութեանց կեցուածքներուն մէջ փոփոխութիւն տեղի չէ ունեցած: