2014-01-31 10:11:53

«Հայաստան պատճառ չի տեսներ ձգձգելու Մաքսային Միութեան անդամակցութեան հոլովոյթը» կ՛ըսէ Սերժ Սարգսեան


Հայաստանի նախագահ Սերժ Սարգսեան ընդգծեց, որ եթէ որոշման հիմքին մէջ մեր ազգային շահը կը գտնուի, ապա Մաքսային միութեան անդամակցութեան որոշումը պէտք է օր առաջ իրականութիւն դարձնել:
Հանրապետութեան նախագահը այս մասին ըսաւ Չեխիոյ մէջ` այդ երկրի նախագահ Միլոշ Զեմանի հետ հանդիպումէն ետք տեղի ունեցած մամլոյ ասուլիսին ընթացքին:
Պատասխանելով «Ազատութիւն» ձայնասփիւռի կայանի հարցումին, թէ ի՞նչը Հայաստանին կը ստիպէ այսքան արագ միանալ Մաքսային միութեան այն պարագային, երբ այդ միութեան նախաձեռնող երկիրը` Ռուսիան, անտարբերութեամբ կը հետեւի, թէ իր դաշնակից Հայաստանի սահմանակից շրջանները ինչպէս ամէն օր կը ռմբակոծուին, եւ եթէ Ռուսիա Հայաստանի դաշնակիցն է Հաւաքական անվտանգութեան պայմանագիրի կազմակերպութեան ծիրին մէջ, ապա ինչպէ՞ս կը մեկնաբանէք այն փաստը, որ Ռուսիա հսկայական քանակութեամբ արդիական զէնք կը վաճառէ Ազրպէյճանին, Հայաստանի նախագահը յայտնեց հետեւեալը. «Որեւէ գործ, որուն ձեռնամուխ կ՛ըլլաս, պէտք է կատարես, ըստ կարելւոյն արագ եւ որակով: Եթէ մենք որոշում տուած ենք միանալու Մաքսային միութեան, ապա պէտք է ատիկա ընենք ըստ կարելւոյն արագ: Ինչո՞ւ դանդաղեցնենք: Եթէ մեր որոշման հիմքին մէջ կը գտնուի մեր ազգային շահը, ապա այդ որոշումը պէտք է օր առաջ իրականութիւն դարձնել: Երկրորդ` կ՛ուզեմ նշել, որ Մաքսային միութիւնը նախ եւ առաջ տնտեսական կառոյց է եւ ոչ թէ զինուորական: Եւ բնաւ պէտք չէ կասկածի տակ դնել հայ-ռուսական ռազմավարական համագործակցութիւնը: Այո՛, ռուսական կողմը կը համագործակցի նաեւ Ազրպէյճանի հետ, բայց ատիկա չի նշանակեր, որ մենք իրաւունք եւ կարելիութիւն ունինք ռուսական կողմին արգիլելու համագործակցութիւնը Ազրպէյճանի հետ»:







All the contents on this site are copyrighted ©.