Të jesh Kishë, nuk do të thotë të administrosh, por të dalësh për t’ia çuar Ungjillin
botës: kështu u tha Papa ipeshkvijve austriakë
Të jesh Kishë, nuk do të thotë të administrosh, por të dalësh për t’ua çuar njerëzve
gëzimin e Ungjillit: këtë pohon Papa Françesku në fjalën drejtuar ipeshkvijve të Konferencës
ipeshkvnore të Austrisë, me të cilët u takua dje në Vatikan, ku ndodhen për vizitë
‘ad Limina”. Teksti, i palexuar, dorëzuar prelatëve, u botua sot.
Takim i frytshëm,
e quan Papa bisedën me ipeshkvijtë austriakë. Ati i Shenjtë kujton vitet kur austriakët
e shikonin plot simpati Kishën e Pasardhësin e Shën Pjetrit. E kjo u pa qartë në
pritjen e përzemërt, që i bënë Benediktit XVI me rastin e vizitës në Austri, më 2007.
Erdhi pastaj, pohon Papa, një fazë e vështirë, gjatë së cilës u pakësua ndjeshëm numri
i katolikëve në gjirin e një popullsie tradicionalisht katolike. E kjo, për një mori
arsyesh, që vijojnë të ndikojnë negativisht prej dhjetra vitesh. Një evolucion i tillë,
nënvizon Françesku, nuk duhet të na gjejë duarkryq, përkundrazi, duhet të na nxisë
t’i shpeshojmë përpjekjet për ungjillëzimin e ri, që është gjithnjë i nevojshëm. Nga
ana tjetër, nënvizon në fjalën e tij Papa, vërehet gatishmëri në rritje për solidaritet;
Karitasi e veprat e tjera të ndihmës, vijojnë të marrin dhurata bujare. E duhet ta
falënderojmë Zotin, lidhur me atë që bën Kisha në Austri për shëlbimin e besimtarëve
e për të mirën e shumë njerëzve. Por nuk duhet vetëm të administrojmë atë që kemi
fituar e që është në dispozicion tonë, vijon teksti, ara e Zotit duhet lëruar e mbjellur
stinë më stinë, që të sjellë fryte edhe në të ardhmen. Të jesh Kishë, nuk do të thotë
të mbarështosh, por të dalësh, të jesh misionar, t’u çosh njerëzve dritën e fesë e
gëzimin e Ungjillit! Nuk duhet të harrojmë se impulsi i impenjimit tonë të krishterë
në botë, nuk është filantropi, nuk është humanizëm i vakët, por është dhuratë e Zotit,
dhanti e Atit, që na bëri bij të Tij përmes Pagëzimit. E kjo dhuratë është njëkohësisht
edhe detyrë. Bijtë e Zotit nuk fshihen, përkundrazi, ia shpallin gjithë botës bijësinë
e tyre hyjnore. E kjo do të thotë, thekson Papa, se duhet të impenjohen për të jetuar
një jetë të shenjtë, për të mos iu nënshtruar kurrë mëkatit, me vetëdijën se Kisha
ka gjithnjë nevojë për pastrim. Prej këndej, ftesa për rizbulimin e Sakramentit të
mrekullueshëm të Rrëfimit, të rrëfyestores, vend ku ndjehet me gjithë fuqinë e saj,
dashuria përdëllyese e Zotit, ku takojmë Krishtin, i cili na jep forcë të pendohemi
e të nisim një jetë të re. Papa, pastaj, thekson se familja është zemra e Kishës
ungjillëzuese. Por, shton, për fat të keq, në kohën tonë, shikojmë se familja dhe
martesa, në vendet e botës perëndimore, po kalojnë një periudhë të re krize të thellë.
Globalizimi e individualizmi pasmodern, favorizojnë një stil jete, që e bën shumë
të vështirë zhvillimin dhe qëndrueshmërinë e lidhjeve ndërmjet njerëzve. E kjo nuk
është fare e favorshme për lulëzimin e kulturës së familjes. Këtu hapet një fushë
e re veprimtarie misionare për Kishën, për shembull, me grupet e familjeve, ku krijohet
hapësira për marrëdhënie me njëri-tjetrin e me Zotin, ku mund të thellohet bashkimi
i vërtetë, mirpritja e njëllojtë për secilin, larg mbylljes në grupe elite. Një
frymë e tillë shëron plagët, ndërton ura, shkon në kërkim të të largtëve e i ndihmon
të gjithë për të mbartur peshën e njëri-tjetrit (Gal 6,2). Kujdesi i Kishës
për familjen, vëren në vijim Ati i Shenjtë, nis nga përgatitja e mirë dhe shoqërimi
i bashkëshortëve të ardhshëm, e sidomos, nga shpjegimi i qartë i doktrinës së Kishës
mbi martesën e familjen.Duke folur, më pas, për famullinë, Papa pohon se bashkësisë
famullitare i prin gjithnjë famullitari, duke u mbështetur në ndihmën e bashkëpunëtorëve
të ndryshëm si dhe të gjithë besimtarëve laikë. Nuk duhet të rrezikohemi ta zbehim
rolin sakramentor të meshtarit. Në qytetet tona e në fshatrat tona, disa janë njerëz
guximtarë, të tjerët, të ndrojtur; disa, të krishterë misionarë, të tjerë, të dremitur.
E ka shumë edhe që janë në kërkim të Zotit, ndonëse nuk e pohojnë haptas. Në këto
rrethana, Papa pohon se t’u çosh njerëzve mesazhin e dashurisë së Zoti e të shëlbimit
të Jezusit, është detyrë e çdo të pagëzuari. E përfundon me fjalët: “Pikërisht në
kohët tona, në të cilat duket se po bëhemi ‘grigjë e vogël’ (Lk 12,32), jemi
të thirrur, si dishepuj të Zotit, të jetojmë jetën e një bashkësie, që është kripë
e tokës e dritë e botës”.