Пантыфік прызначыў новага старшыню Бюро фінансавай інфармацыі
Папа Францішак здзейніў
змены ў структуры Бюро фінансавай інфармацыі Апостальскай Сталіцы. 30 студзеня 2014
г. ён прызначыў на пасаду старшыні “ad interim” (выконваючага абавязкі) гэтай структуры
італьянскага біскупа Джорджыа Карбеліні. Апошні добра знаёмы з дзейнасцю ватыканскіх
структур – на службе Святому Пасаду ён знаходзіцца з 1985 г. У перыяд паміж 1993 і
2011 гадамі іерарх быў падсакратаром Губернатарата Дзяржавы Ватыкан. Разам з Бюро
фінансавай інфармацыі ён працягне кіраваць Аддзелам працы Апостальскай Сталіцы і Дысцыплінарнай
камісіяй Рымскай курыі, старшынёй якіх з’яўляецца.
Новае прызначэнне звязана
з адстаўкай кардынала Аціліа Нікоры з пасады старшыні Бюро фінансавай інфармацыі.
Аб ёй Святога Айца папрасіў сам пурпурат. Ён узначальваў структуру з моманту яе заснавання
30 снежня 2010 г. і быў адным з ініцыятараў першых крокаў Апостальскай Сталіцы на
шляху да поўнай фінансавай празрыстасці і далучэння да міжнародных стандартаў у сферы
супрацьдзеяння адмыванню грошай і фінансаванню тэрарызму.