Papa, Universitetit Notre Dame: mos e zbehni identitetin katolik

Sot paradite, Papa Françesku priti një delegacion të Universitetit “Notre Dame” (Zoja e Bekuar) të shtetit amerikan të Indianës, me rastin e përurimit të selisë së re në Romë. Ati i Shenjtë falenderoi drejtuesit e këtij institucioni akademik, themeluar në vitin 1842 nga atë Eduard Sorin, anëtar i Kongregatës të së Shenjtes Krygjë:
“Që nga themelimi, Universiteti “Notre Dame” jep një kontribut të çmuar për Kishën e vendit tuaj, me impenjimin e tij në edukimin fetar të të rinjve e me mësimin e dijeve, të frymëzuara nga besimi në harmoninë ndërmjet fesë dhe arsyes për të ndjekur të vërtetën dhe udhën e drejtë”.
Hapja e kësaj selie të universitetit në Romë, është rast, që u jep mundësinë studentëve të njihen me pasuritë historike, kulturore e shpirtërore të Qytetit të Amshuar, me vazhdimësinë e fesë së Shën Pjetrit e të Shën Palit, me njerëzit e Zotit e me martirët e çdo epoke e me fenë e transmetuar përmes familjeve, shkollave e famullive.
Kujtojmë se Universiteti “Notre Dame” ka shkaktuar debate të mëdha në ambientet katolike, kur i dha, në vitin 2009, diplomën “Honoris Causa” në jurisprudencë presidentit të SHBA-ve, Barak Obama, pavarësisht se ky i fundit ishte dhe mbetet në favor të abortit. Papa Françesku u bëri thirrje drejtuesve të universitetit, që t’i qëndrojnë besnikë ideve të themeluesit, atë Eduard Sorin:
“Për këtë, është thelbësore dëshmia e guximshme e universiteteve katolike për mësimet morale të Kishës dhe mbrojtja e lirisë për t’i mbështetur ato mësime”.
Mësimet e Kishës, kujtoi Papa Françesku, kanë autoritetin e magjisterit të Barinjve të saj e duhen përçuar nga institucionet edukative kishtare tek studentët e në shoqëri:
“Uroj që universiteti ‘Notre Dame’ të vazhdojë të japë dëshminë e dosmodoshme dhe të qartë për këtë aspekt të identitetit të tij themelor katolik, sidomos para tundimeve për ta zbehur, nga cilado anë të vijnë”.