Ֆրանչիսկոս Քահանայապետի պատգամը Քահանայապետական կաճառներու 8-րդ հանրային նիստի առթիւ։

Քահանայապետական կաճառներու 8-րդ հանրային նիստը տեղի ունեցաւ, երեքշաբթի 28 յունուարի յետմիջօրէին Հռոմի մէջ։ Նիստի բնաբանն էր ''Հաւատքի աչքեր։ իրականութիւնը կարդալ Քրիստոսի աչքերով''։
Այս առթիւ Գերապայծառ Փիէրօ Գոտա, Քահանայապետական Աստուածաբանական կաճառի ակադեմիկոս, ելոյթ ունեցաւ, մեկնաբանելով ''Հաւատքի Լոյս'' շրջաբերականը եւ ''Աւետարանի ուրախութիւն'' առաքելական յորդորագիրը։
Նիստի ընթացքին Վատիկանի Պետական Քատուղար` գերապայծառ Փիէդրօ Փարոլինը, յանուն Սրբազան Քահանայապետին, Սուրբ Թովմաս Աքուինացիի մասին ուսումնասիրութիւններ կատարած երկու երիտասրադ ակադեմիկոսներու յանձնեց` Քահանայապետական կաճառներու մրցանակը` Հայր Ալէսսանտրօ Քլեմենցիա եւ Բրօֆ Մարիա Սիլվիա Վաքքարէցցա։
Քահանայապետական կաճառներու վերոյիշեալ նիստի առթիւ, Ֆրանչիսկոս Քահանայապետը պատգամ մը ուղղեց ներկաներուն, որուն մէջ շնորհակալութիւն յայտնեց անոնց հանրային նիստի ընտրած նիւթին համար, մատնանշելով թէ երկու փաստաթուղթերու մէջ ինք ուզած է խորհրդածել հաւատքի ''լուսաւորութեան'' ծաւալի եւ հաւատքի ու ճշմարտութեան մէջեւ կապի մասին, եւ զանոնք քննարկել ոչ միայն մտքի աչքերով այլ նաեւ սրտի աչքերով, այսինքն սիրոյ հեռանկարով։
Ֆրանչիսկոս Քահանայապետը պատգամին մէջ մեկնաբանեց Սուրբ Պօղոսի Հռոմէացիներու ուղղած խօսքը ''Սրտով հաւատալ'', մէջբերելով ''Հաւատքի Լոյս'' շրջաբերականէն հատուածներ։ Անա ապա խօսքը կեդրոնացուց ''Եկեղեցւոյ ուղեւորութեան եւ անոր միսիոնարական հեռանկարին'' վրայ որ պարզուած է ''Աւետարանի ուրախութիւնը'' առաքելական յորդորագիրին մէջ։ ''Միսիոնարական ընտրութիւն մը որ կարող է ամէն ինչ բարեփոխել եւ որ կը հայի համայն Եկեղեցւոյ, ուստի Քահանայապետական կաճառները եւս կանչուած են այս բարեփոխումը հետապնդելու, Եկեղեցական մարմնին տալու համար իրենց սատարը։ Ասոր համար, սիրելի եւ յարգելի եղբայրներ, - կը գրած է Քահանայաղփտը իր պատգամին մէջ - կը խնդրեմ ձեր համագործակցութիւնը, համայն Եկեղեցւոյ առաքելութեան ծառայութեան ուղիով։
Նորին Սրբութիւն հուսկ իր գոհունակութիւնը յայտնեց, երկու երիտասարդ ուսումնասէր ակադեմիկոսներուն յանձելու Քահանայապետակն Կաճառներու մրցանակը, ու ապա բոլորին մաղթեց պտղաբեր հետազօտական աշխատանք, զանոնք յանձնելով` ''Իմաստութեան Թագուհի'', Սուրբ Կոյս Մարիամի հովանիին ու ապա խնդրեց որ աղօթեն իրեն համար ու ջամբեց իր առաքելական օրհնութիւնը։