Ukrainë: Imzot Shevchuk takohet me presidentin Yanukovych, si ndërmjetës mes qeverisë
e manifestuesve
Kishat e krishtera në Ukrainë ofruan ndërmjetësinë mes qeverisë e forcave të opozitës,
ndërsa vijon vala e dhunës në vend. Të premten e kaluar, sipas agjencisë Risu, presidenti
Yanukovych u takua me disa përfaqësues të Këshillit të Kishave dhe të organizatave
fetare të Ukrainës. Ndërmjet tyre, kreu i Kishës greko-katolike të Ukrainës, kryeipeshvi
i madh i Kyiv-Haly, Sviatoslav Shevchuk. Prelati shprehu shqetësimin e tij të thellë
për kthesën e dhunshme të protestave në shesh, filluar me frymë paqësore. Gjatë bisedimeve,
kryeipeshkvi Shevchuk pohoi se Kisha ka qenë e vijon të jetë gjithnjë përkrah popullit.
Prelati iu ankua presidentit për vështirësitë që po u krijohen meshtarëve, të cilët
dëshirojnë t’u japin manifestuesve ndihmën e nevojshme shpirtërore. Kujtoi edhe se
prania e tyre ka qenë themelore për të qetësuar shpirtrat e për të ndikuar që protesta
ta ruajë karakterin e saj paqësor. I pyetur nga gazetarët për rezultatet e takimit,
prelati deklaroi se do të jenë faktet ato, që do të flasin më mirë për qëllimet e
presidentit Yanukovych. Ndërkaq kryetari i Konferencës ipeshkvnore kanadeze, Paul
André Durocher, në një mesazh drejtuar imzotit Shevchuk, i shpreh solidaritetin
e tij popullit të Ukrainës. “Lutem, që vendit t’i sigurohen të gjitha të drejtat
e liritë, posaçërisht e drejta për jetën dhe dinjitetin, liria e ndërgjegjes dhe e
fesë, liria e shprehjes dhe pavarësia nga qeveria”, lexohet në një mesazh tjetër të
ipeshkvit kanadez, drejtuar imzot Lawrence Huculak, kryetar i bashkësisë greko-katolike
ukrainase në Kanada.