Գահիրէի մէջ երէկ տեղի ունեցան իրերայաջորդ պայթումներ: «ՌԻԱ Նովոսթի» կը հաղորդէ,
որ առաջին պայթումը տեղի ունեցաւ Գահիրէի ոստիկանութեան կեդրոնական բաժանմունքին մօտ`
կառոյցէն 5 քիլոմեթր հեռու: Տեղի ունեցածը ականուած ինքնաշարժով անձնասպանական գործողութիւն
մըն էր, որուն պատճառով ոստիկանութեան կեդրոնին չորս յարկերը փուլ եկան: Արձանագրուեցաւ
չորս զոհ: Երկրորդ պայթումը տեղի ունեցաւ առաջինէն երեք ժամ ետք Տոքի թաղամասին մէջ`
մեթրոյի կայարանին մօտ: Արձանագրուեցաւ զոհ մը եւ 17 վիրաւոր: «Ռաշա Թուտէյ» կը հաղորդէ,
որ ոստիկանութեան բաժանմունքին մօտ տեղի ունեցած է մէկ այլ պայթում մը եւ հրացանաձգութիւն`
հակառակ անոր որ իշխանութիւնները առաջին պայթումէն ետք յայտարարած էին, որ անվտանգութեան
միջոցառումները խստացուած են: Իսլամ եղբայրները հերքեցին ահաբեկչական յարձակումներու
հետ իրենց առնչութիւնը: Երրորդ պայթումը տեղի ունեցաւ բուրգերու մօտակայ ոստիկանատան
մօտ եւ ատոր պատճառով կայ հինգ զոհ: