ኡክራይን፦ ሊቀ ጳጳሳት ሸቭቹክ “ደም ምፍሳስ ደው ይበል”

ናይ ኪየቭን ሃልይ ዓቢይ ሊቀ ጳጳሳት ብፁዕ ኣቡነ ስቪኣቶስላቭ ሸቭቹክ እቲ ኣብ ኡክራይን ተኸሲቱ ዘሎ ዘይምርግጋእ ብሰላማዊ መገዲ ክፍታሕ እቲ ኣብ መንጐ ሰላማዊ ሰልፊ ዘካይድ ሕዝብን ሓላዋ ጸጥታን ተኸሲቱ ዘሎ ውጥረትን ግጭትን ኩሉ ብስም እግዚኣብሔር ደው ክብል ጻውዒት ከምዘቕረቡ ሲር ናይ ዜና ኣገልግሎት ሓቢሩ።
ዓመጽ ኣብ ሓደ ናጻን ሉኣላውነት ሕጊ ለበስ ኣብ ዝኾነ ሃገር ከም መፍትሒ ኰይኑ ፈጺሙ ክቐርብ ከምዘይብሉ ዝገለጹ ናይ ግሪክ ስርዓት እትኽተል ካቶሊካዊት ቤተ ክርስቲያን ኣብ ኡክራይን ዓቢይ ሊቀ ጳጳሳት ብፁዕ ኣቡነ ሸቭቹክ መንግስቲ ሓይሊ ካብ ምጥቃም ተቖጢቡን ሰላማዊ ሰልፊ ዘካይድ ሕዝቢ ብሰላም ድምጹ ከስምዕን ኣብ ሓላፍነት ዘሎ መንግስቲ ድማ ድምጽን ሕቶን ሕዝቢ ክሰምዕን ክመያየጥን ሓደራ ቢሎም፣ ዓመጽን ጸቕጥን መፍትሒ ክኸው ኣይክእልን እዩ። ናይ ፖለቲካ ዓበይቲ ኣካላት ሓላፍነት ኣገልግሎቶም ብግቡእን ንናይ ሕዝብን ሃገርን ረብሓ ክውዕሉ እንክብሉ ኣብ ዘመሓላለፍዎ ጻዕዊት ከምዘስመርሉ ዝሓበረ ሲር ናይ ዜና ኣገልግሎት ኣስዒቡ፣ ሕዝቢ ሕቶኡ ብሰላማዊ መገዲ ከቃልሕን እቶም ናብ ቤተ ማእሰርቲ ዝተወስዱ ድማ ኣብ ሕሊናን ሓቅን ዝተመርኰዘ ፍርዲ ክረኽቡ እምበር ካብ ጽልኢ ዝምንጭ ውሳኔ ክይወሃቦም ሓደራ ቢሎም ካህናት ኡክራይን ናይ ወንጌል ሰላም ብምእዋጅ ምእመናን ኣብ ምንቃሕን ምሕናጽን ክተግሁ ከምዘተሓሳሰቡ ኣመልኪቱ።