Французскія католікі напісалі Францішку пра сваю сітуацыю
Больш за 105 тыс.
французскіх католікаў, у адпаведнасці з інфармацыяй агенцтва “AFP “, у асноўным моладзь,
падпісалі петыцыю да папы Францішка перад запланаваным на 24 студзеня 2014 г. візітам
у Ватыкан Франсуа Аланда. Яны просяць Святога Айца, каб падчас размовы з Прэзідэнтам
выказаў занепакоенасць і незадаволенасць французскіх католікаў. Прычын для гэтага
шмат. У першую чаргу, аўтары петыцыі нагадваюць аб устанаўленні інстытуту так званых
гомасексуальных сужэнстваў, праз якія дзеці наўмысна былі пазбаўлены свайго асноўнага
права на бацьку і маці. Гэтым таксама быў адкрыты шлях да гандлю чалавечым целам.
Голас католікаў у гэтым пытанні быў праігнараваны і задушаны такім нягодным чынам,
што гэта сустрэлася з асуджэннем з боку Савета Еўропы.
Аўтары нагадваюць, што
католікі ў Францыі з’яўляюцца прадметам гвалтоўнай негатыўнай кампаніі ў СМІ. З іх
беспакарана можна насмейвацца. Памнажаюцца акты вандалізму і прафанацыі, якія рэдка
знаходзяць свой фінал у судзе. Імі не цікавяцца медыя і цяперашнія ўлады. Католікі
сутыкаюцца з усё большым абмежаваннем свабоды слова. Нядаўна, напрыклад, “злачынства”
перашкоды ў здзяйсненні аборту было распаўсюджана і на крытыку абортаў.
Французскія
католікі таксама нагадваюць аб прэзідэнцкіх планах, якія тычацца ўвядзення эўтаназіі,
і змене ўсяго складу Нацыянальнага камітэта па этыцы пасля таго, як той прыняў адмоўнае
рашэнне адносна легалізацыі эўтаназіі. У новы склад Камітэту не ўвайшоў ніводзін прадстаўнік
рэлігійных супольнасцяў. Петыцыя інфармуе Папу таксама пра індактрынацыю у французскіх
школах, натхнёную гендэрнай ідэалогіяй.
Трэба нагадаць, што на мінулым тыдні
пра сустрэчу з Аландам Папа размаўляў з прэзідыумам французскага епіскапату. Біскупы
заявілі пасля, што Францішак надзвычай добра разбіраецца ў сітуацыі ў Францыі.