Զուիցերիոյ մէջ Մեկնարկած է Սուրիոյ Հարցով «Ժընեւ-2» Համաժողովը
Զուիցերիոյ Մոնթրէօ քաղաքին մէջ մեկնարկած է Սուրիոյ հակամարտութեան կարգաւորման ուղղուած
«Ժընեւ-2» միջազգային համաժողովը: Համաժողովին կը մասնակցի 39 երկիր, ՄԱԿ-ի գլխաւոր
քարտուղարը, Արաբական պետութիւններու լիկայի եւ Իսլամական համագործակցութեան կազմակերպութեան
ղեկավարները, Սուրիոյ կառավարութեան եւ ընդդիմութեան պատուիրակութիւնները: Յայտնի
է, որ Յունուար 24-ին պաշտօնական Դամասկոսն ու ընդդիմադիրները խաղաղ կարգաւորման ուղիներու
փնտռտուքը պիտի շարունակեն Ժընեւի մէջ ՄԱԿ-ի ներկայացուցչութեան մօտ: Իսկ Մոնթրէոյի
մէջ Սուրիոյ նախագահ Պաշար ալ Ասատի մօտ 300 ներկայացուցիչներ ցոյց կազմակերպած են այն
հիւրանոցի մուտքին մօտ, ուր կ’իրականացուի համաժողովը: Համաժողովի նախօրէին բանակցութիւններէն
դուրս մնացած Իրանի նախագահ Հասան Ռոհանին այսօր յայտարարած է, որ Սուրիոյ խաղաղ բանակցութիւնները
հազիւ թէ յաջողութեամբ պսակուին ահաբեկչութեան դէմ պայքարին մէջ: Երէկ գիշերը յայտնի
դարձած էր նաեւ, որ Սուրիոյ քիւրտերը ինքնավարութիւն հռչակած են երկրի հիւսիսը. անոնք
անմիջական ներկայացուածութիւն չունին համաժողովին: