10 mijë shtegtarë në lutje, në Uashington, para Marrshimit për Jetën
Mëse 10 mijë vetë morën pjesë mbrëmë në lutjen e organizuar në Shenjtëroren e Zojës
së Papërlyer në Uashington, në prag të Marrshimit për Jetën. Meshën e kremtoi kryeipeshkvi
i Bostonit e kreu i Komisionit ipeshkvnor pro-jetës, kardinali Shon O’Mallej. Nga
mesnata, besimtarët mundën të rrëfeheshin në kriptën e shenjtërores për të vazhduar
me Rruzaren Shenjte, adhurimin e të Shenjtnueshmit Sakrament e me lutje deri në mëngjes,
kur morën pjesë në meshën e kremtuar nga kryeipeshkvi i Filadelfias, imzot Çarls Çaput.
Më pas, Marrshimi drejt Gjykatës së Lartë, çast kulmor i edicionit të dytë të “Nëntëshes
së lutjes e të pendesës”, në të cilën kanë marrë pjesë këto ditë të gjitha dioqezat
amerikane. Gjithashtu, më 25 janar, në San Francisko do të zhvillohet Marrshimi i
10-të për jetën në Bregun Perëndimor. Këtë vit, vëmendja u përqendrua në normat
e reformës shëndetësore të presidentit Barak Obama, që u imponojnë punëdhënësve t’u
japin punonjësve sigurime shoqërore, ku përfshihen edhe metodat kontraceptive abortive.
Me një vendim befasues, më 31 dhjetor, gjykatësja kushtetuese Sonia Sotomajor e bllokoi
përkohësisht këtë masë, pas ankimimit të një grupi murgeshash të Denverit, në Kolorado.
Dy janë mundësitë: ose të tërhiqet pezullimi duke bërë që norma të hyjë në fuqi, ose
t’i kalohet çështja Gjykatës së Lartë, e cila mund të shprehet përfundimisht pas disa
muajsh. Kjo mund ta kthejë çështjen e abortit në temë të rëndësishme debati politik.