Միջին Արեւելքին մէջ Քրիստոնէութիւնը պէտք է հաւատարիմ մնայ իր անցեալին, ներկային ու
ապագային նկատմամբ Արամ Ա.Կաթողիկոս
Ժընեւի Եկեղեցիներու համաշխարհային խորհուրդի կեդրոնատեղիին մէջ քանի մը օրեր առաջ գումարուած
համագումարին, որ յատկացուած էր «Ժընեւ-2» խորհրդաժողովին Եկեղեցիներու Համաշխարհային
խորհուրդի բերելիք նպաստին, Միջին Արեւելքէն Քրիստոնէութեան արտագաղթի հարցը լայնօրէն
քննարկուեցաւ: Այս հարցին անդրադառնալով` Արամ Ա. կաթողիկոս իր լուրջ մտահոգութիւնը
յայտնեց Միջին Արեւելքի մէջ քրիստոնէական ներկայութեան հետզհետէ նուազումին նկատմամբ:
«Հսկայ քրիստոնէական գաղութները Միջին Արեւելքի մէջ վերջին տասնամեակներուն սկսած են
կորսնցնել իրենց քանակային թէ որակային հզօրութիւնը: Պահ մը դիտեցէք երէկի ու այսօրուան
քրիստոնէական ներկայութիւնը Երուսաղէմի մէջ, Իրաքի մէջ, Լիբանանի ու Սուրիոյ մէջ: Քրիստոնէութեան
ծննդավայրը դարձած Միջին Արեւելքը այսօր կը պարպուի իր քրիստոնէական ներկայութենէն: Սուրիան,
պատմական բարով Անտիոքը, որ եղած է հզօր կեդրոններէն մէկը քրիստոնէութեան, վերջին տարիներու
տագնապին բերումով սկսած է կորսնցնել իր քրիստոնեայ բնակչութեան մէկ կարեւոր մասը: Խորապէս
մտահոգիչ է այս երեւոյթը: Քրիստոնէական ներկայութիւնը շրջանին մէջ կենսական է թէ՛ արեւմուտքի
եւ թէ՛ իսլամութեան համար: Քրիստոնէական պատմութիւնը Միջին Արեւելքի մէջ եղած է տագնապներով
լեցուն. սակայն եկեղեցիները կառչած մնացած են իրենց իրաւունքներուն, աւանդութիւններուն
ու արժէքներուն: Նոյնը պէտք է ըլլայ այսօր»,- նշեց վեհափառ հայրապետը: Շարունակելով
իր խօսքը` վեհափառ հայրապետը ըսաւ,- «Մենք կը գնահատենք արեւմտեան կարգ մը երկիրներուն
աջակցութիւնը քրիստոնեայ գաղթականները ժամանակաւորապէս ընդունելու: Սակայն զգուշ պէտք
է ըլլալ եւ պէտք չէ քաջալերել քրիստոնեաներուն արտագաղթը Միջին Արեւելքէն: Այս է շրջանի
բոլոր եկեղեցիներուն յստակ քաղաքականութիւնը: Մենք դէմ ենք արտագաղթին, որքան ալ դժուար
ըլլան մեզ շրջապատող պայմանները»: Վեհափառ հայրապետին մտահոգութեան նոյն ուժգնութեամբ
արձագանգեցին Միջին Արեւելքէն ներկայ պատրիարքները եւ բարձրաստիճան հոգեւորականները:
Անոնք եւս իրենց կարգին յիշեցուցին քրիստոնէութիւնը շրջանին մէջ ամուր պահելու հրամայական
անհրաժեշտութիւնը եւ կոչ ուղղեցին արեւմտեան պետութիւններուն` օգտակար ըլլալու այս ուղղութեամբ: