Në Montreux vlojnë përgatitjet për Konferencën e paqes “Gjeneva 2”. Kishat e krishtera
kërkojnë armëpushim në Siri e lutje
Prag konference plot tension në Montreux të Zvicrës, ku nesër do të hapet konferenca
e paqes mbi Sirinë, e ashtuquajtura “Gjeneva 2”. Diplomacia ndërkombëtare po punon
për dialogun ndërmjet palëve, që duhet të çojë në zgjidhjen politike të luftës civile,
e cila në tri vjet, ka shkaktuar mëse 130 mijë viktima e miliona të shpërngulur e
refugjatë. Delegacioni i regjimit të Damaskut dhe ai i opozitës, të paktën sipas
organizatorëve, duhet të ulen ballë për ballë në tryezën e bisedimeve. Sigurisht,
ndjehet mungesa e Iranit, i cili u ftua nga OKB-ja, që brenda 24 orësh e tërhoqi ftesën
pasi Teherani nuk ka nënshkruar as rezultatet e konferencës “Gjeneva 1”, që parashikon
një qeveri tranzicioni për t’i dhënë fund krizës. Kjo - arsyeja zyrtare, por dihet
se pas ftesës, opozita siriane kërcënoi se nuk do të merrte pjesë në mbledhje, gjë
që ndryshoi menjëherë mendimin e Sekretarit të Përgjithshëm të OKB-së, Ban Ki-mun,
për pjesëmarrjen e Iranit. Ndërkaq, Kishat e krishtera në Siri u kanë bërë thirrje
besimtarëve të luten për suksesin e konferencës “Gjeneva 2”. Njëkohësisht ato i kërkojnë
gjithë botës e Kishave simotra të luten për fundin e luftës e të dhunës, duke uruar
të bëhen hapa konkrete drejt pajtimit kombëtar. Edhe Këshilli Botëror i Kishave,
i cili mblodhi në Gjenevë rreth 30 krerë fesh, ka hartuar një dokument për t’iu dorëzuar
përfaqësuesit të OKB-së për Sirinë, Lakhdar Brahimi, Lidhjes Arabe dhe protagonistëve
të tjerë të konferencës. Në konfliktin sirian, thuhet në të, nuk ekziston zgjidhje
ushtarake. Nevojitet një armëpushim i menjëhershëm për të siguruar asistencën humanitare.
Udha më e drejtë, nënvizon Këshilli Botëror i Kishave, është parashikimi i një procesi
të plotë e gjithëpërfshirës për vendosjen e paqes e rindërtimin e Sirisë. Në hartimin
e dokumentit morën pjesë përfaqësues të Vatikanit, të Kishave të Lindjes së Mesme,
të Rusisë, të SHBA-ve e të kombeve të tjera evropiane: katolikë, ortodoksë, protestantë
e anglikanë.