Papa, Inspektoratit të Policisë në Vatikan: besimtarët e dinë se mund të kenë besim
tek ju
Vigjilencë, mirësjellje e përkushtim: sipas Papës Françesku, këto janë karakteristikat
e personelit të Inspektoratit të Policisë pranë Vatikanit, të cilin e priti sot në
Sallën Klementine të Pallatit Apostolik. Besimtarët e shtegtarët, që vijnë në Sheshin
e Shën Pjetrit, u tha Ati i Shenjtë punonjësve të rendit, e dinë se mund të kenë besim
të plotë tek ju. Papa Bergolio, duke u uruar Vitin e Ri që sapo ka filluar, i falenderoi
për impenjimin e tyre të përditshëm, sidomos në kohë fluksi më të madh shtegtarësh,
që vijnë për t’u lutur në Varrin e Shën Pjetrit, ose në atë të papëve paraardhës,
si Gjoni XXIII apo Gjon Pali II: “…në të ftohtë
e në vapë, në kohë me shi e me erë, gjithmonë! E kjo ka shumë rëndësi! Të gjithë jemi
të vetëdijshëm se duhet të veprojmë që të ruhet veçoria e këtij vendi, të ruhen tiparet
e kësaj hapësire të shenjtë e universale”. Prania e punonjësve të rendit i
bën njerëzit më të qetë. Kështu, mund të shijojnë më mirë çastet e lutjes e të kundrimit
në Bazilikën e Vatikanit e në Sheshin e Shën Pjetrit: “Puna juaj kërkon përgatitje
teknike e profesionale, si edhe vigjilencë plot kujdes, mirësjellje e përkushtim.
Shtegtarët dhe turistët, por edhe të gjithë ata, që punojnë në zyrat e ndryshme të
Selisë së Shenjtë, e dinë se mund të kenë besim në ndihmën tuaj të përzemërt”. Së
fundi, Papa Françesku uroi që punonjësit e Inspektoratit ta shfrytëzojnë kohën e shërbimit
pranë Vatikanit, për t’u rritur në fe. “Feja – u tha Ati i Shenjtë – është thesari
më i çmuar, që ju kanë lënë prindërit e që ju duhet t’ua transmetoni fëmijëve”: “Është
e rëndësishme të rizbuloni mesazhin e Ungjillit e ta pranoni në thellësinë e zemrës
e në jetën e përditshme, duke dëshmuar me guxim dashurinë e Zotit në çdo ambient,
edhe në punë”.