Святы Айцец падтрымаў удзельнікаў “Марша за жыццё” у Парыжы
Папа Францішак падтрымаў
“Марш за жыццё” у Парыжы, правядзенне якога запланавана на 19 студзеня 2014 г. Апостальскі
нунцый у Францыі арцыбіскуп Луіджы Вентура ў спецыяльным пасланні адзначыў, што Святы
Айцец паінфармаваны аб ініцыятыве і падтрымлівае ўдзельнікаў акцыі. Папа заклікаў
“захоўваць жывую ўвагу да такой важнай тэмы” як абарона ненароджаных дзяцей, а таксама
параіў яшчэ раз перачытаць яго гамілію, прамоўленую 16 чэрвеня 2013 г. з нагоды Дня
“Evangelium vitae”, які праходзіў у Ватыкане.
Пантыфік нагадаў пра важнасць
тэмы абароны жыцця некалькі дзён таму падчас сустрэчы з прадстаўнікамі дыпламатычнага
корпуса акрэдытаванага пры Апостальскай Сталіцы. Між іншым Папа сказаў, што “палохае
толькі адна думка пра тое, што існуюць дзеці, якія ніколі не змогуць убачыць святло
– ахвяры аборту”.
“Маршы за жыццё” адбываюцца ў падтрымку ненароджаных дзяцей,
якім пагражае аборт. Іх мэта заключаецца ў прыцягненні ўвагі да праблемы забойства
ненароджаных дзяцей. Праходзяць такія акцыі ў многіх краінах свету па ініцыятыве рухаў
“pro-life” і падтрымліваюцца Каталіцкім Касцёлам, а таксама іншымі рэлігійнымі і грамадскімі
супольнасцямі.