ՊՈԼԻՍ.- Թուրքիոյ լրագրողներու միութիւնը Երկուշաբթի, Յունուար 20ին պիտի ոգեկոչէ «Ակօս»
շաբաթաթերթի սպաննուած խմբագրապետ Հրանդ Տինքի յիշատակը, կը տեղեկացնէ թրքական «Սթար»
թերթը: Յիշատակի այս արարողութիւնը տեղի պիտի ունենայ «Մասնագիտութեան մէջ հետք ձգածները»
խորագիրով համաժողովին ծիրէն ներս: Միջոցառման հրաւիրուած են «Ակօս»ի խմբագիր Ռոպեր
Քոփթաշ, թերթի սիւնակագիրներէն Կարին Քարաքաշ եւ «T24» կայքի սիւնակագիր Այտըն Էնկին: Տինք
ծնած է 1954ի Սեպտեմբեր 15ին, Մալաթիա: Կրթութիւնը ստացած է Պոլսոյ մէջ եւ լրագրութեան
ասպարէզ նետուած է 1990ականներուն: Ապա հիմնած է թրքերէնով եւ հայերէնով լոյս տեսնող
«Ակօս» շաբաթաթերթը: Իր համարձակ յօդուածներուն պատճառով ան յաճախ ձերբակալուած է եւ
անոր դէմ բազմաթիւ դատեր բացուած են: Սպաննուած է 2007ի Յունուար 19ին, «Ակօս»ի խմբագրատան
դիմաց: