Пасол ЗША пры Святым Пасадзе пракаментаваў сустрэчу Паралін-Кэры
Дзяржаўны сакратар
Яго Святасці Папы, арцыбіскуп Пьетра Паралін, правёў 14 студзеня 2014 г. перамовы
з Дзяржсакратаром ЗША Джонам Кэры па многіх пытаннях, у тым ліку па сітуацыі ў Сірыі.
Сустрэча ў Ватыкане папярэднічала міжнароднай жэнеўскай канферэнцыі, якая пройдзе
22 студзеня з мэтай пакласці канец сірыйскаму канфлікту. Пасол ЗША пры Святым Пасадзе
Кэнэт Хакет сказаў Ватыканскаму радыё, што сустрэча прайшла паспяхова. “Гэта было
вельмі важнае і вельмі працяглае спатканне”, - паведаміў дыпламат. “Яно ахоплівала
многія тэмы, не апошняй з якіх была сустрэча “Жэнева II”, і надзеі і спадзяванні,
звязаныя з гэтай канкрэтнай сустрэчай”, - дадаў ён.
Хакет працытаваў Джона
Кэры, які сцвердзіў, што насілле і вайна не з’яўляюцца адказам на праблемы ў краіне.
Падчас ватыканскай сустрэчы не ўзнікла рознагалоссяў па ніводнай з існуючых праблем,
сказаў пасол ЗША. У абодвух бакоў існуе надзея, што за стол перамоў у Жэневе сядуць
“патрэбныя людзі” “з правільным стаўленнем”, пасля чаго можа пачацца працэс спынення
ваенных дзеянняў.