Святы Пасад падтрымлівае
на сённяшні дзень поўныя дыпламатычныя адносіны са 180 дзяржавамі. Гэты спіс замыкае
Паўднёвы Судан, з якім пагадненне было падпісана 22 лютага 2013 г., гаворыцца ў паведамленні
Залы Друку Апостальскай Сталіцы. Спецыяльны характар маюць адносіны з Палестынай.
Святы Пасад прысутнічае таксама ў Арганізацыі Аб’яднаных Нацый у якасці назіральніка
і з’яўляецца членам 7 устаноў яе сістэмы. Апрача таго, Апостальская Сталіца мае статус
назіральніка або члена ў 8 іншых міжнародных і 5 рэгіянальных арганізацыях. Варта
адзначыць, што 5 снежня 2011 г. у Жэневе, Рада Міжнароднай арганізацыі па міграцыі
прыняла Святы Пасад у свае структуры ў якасці члена.
У 2013 г. ватыканская
дыпламатыя адзначыла шэраг поспехаў. Так, 21 студзеня 2013 г. у Сан-Сальвадоры, у
штаб-кватэры Генеральнага сакратарыяту “Цэнтральна-амерыканскай сістэмы інтэграцыі”,
было падпісана пагадненне паміж Святым Пасадам і гэтай арганізацыяй. Апостальская
Сталіца атрымала статус назіральніка. У чэрвені 2013 г. Святы Пасад падпісаў пагадненне
з Рэспублікай Каба-Вэрдэ, а ў кастрычніку 2013 г. з Венгрыяй. У тым жа месяцы было
ратыфікавана пагадненне паміж Апостальскай Сталіцай і Рэспублікай Экватарыяльная Гвінея,
а ў лістападзе 2013 г. падпісана пагадненне з Рэспублікай Чад аб прававым статусе
Каталіцкага Касцёла ў краіне.