Kalendari i kremtimeve liturgjike, kryesuar nga Papa, në janar e shkurt
U bë i njohur kalendari i kremtimeve liturgjike të kryesuara nga Papa Françesku, në
janar e në shkurt. Të dielën, më 19 janar, Ati i Shenjtë do të shkojë për vizitë baritore
në famullinë romake të Zemrës së Krishtit në Kastro Pretorio. Të shtunën, 25 janar,
Papa do të kryesojë Mbrëmësoret e orës 17.30, në Bazilikën e Shën Palit jashtë Mureve,
në Solemnitetin e Kthimit të Shën Palit Apostull. Të dielën, më 2 shkurt, në Bazilikën
e Shën Pjetrit, do të kremtojë meshën së bashku me anëtarët e Instituteve të Jetës
Rregulltare dhe Shoqërive të Jetës Apostolike, në festën e Paraqitjes së Krishtit
në Tempull e në Ditën XVIII Botërore të Jetës së Shuguruar. Të dielën, 16 shkurt,
në orën 16.00, vizita baritore në famullinë romake të Shën Tomës Apostull. Të shtunën,
më 22 shkurt, në Solemnitetin e Katedrës së Shën Pjetrit, Papa Françesku do të kryesojë,
në Bazilikën e Shën Pjetrit, në orën 11, Koncistorin e zakonshëm publik për krijimin
e kardinajve të rinj. Së fundi, të dielën, më 23 shkurt, do të kryesojë meshën në
Bazilikën e Vatikanit, në bashkëkremtim me kardinajtë e rinj.