Երեւանի Սուրբ Գրիգոր Լուսաւորիչ Եկեղեցւոյ Հոգեւոր Այրերը “Խոկման” Արարողութիւն Պիտի
Կատարեն
Երեւանի Սուրբ Գրիգոր Լուսաւորիչ մայր եկեղեցւոյ մէջ Յունուար 14-ին` ժամը 18:00-ին,
հոգեւոր տեսուչ Տէր Անոյշաւան եպիսկոպոս Ժամկոչեանի տնօրինութեամբ տեղի պիտի ունենայ
“Խոկման” տարեսկզբեան արարողութիւնը: Այս մասին կը յայտնեն Սուրբ Գրիգոր Լուսաւորիչ եկեղեցիէն: Նոյն
ընթացքին պիտի քարոզէ Սուրբ Գրիգոր Լուսաւորիչ եկեղեցւոյ հոգեւոր հովիւ եւ “Խոկման” արարողութեան
կազմակերպման պատասխանատու Տէր Յակոբ քահանայ Խաչատրեանը: Այնուհետեւ մասնակիցները հնարաւորութիւն
պիտի ունենան ունկնդրելու “Հաւատամք” երգչախումբի հոգեւոր երգեցողութիւնը: Յաւարտ
արարողութեան` “Խոկման” արարողութեան մասնակիցները, “Տէր, ողորմեա…”-ի ծնկաչոք երգեցողութեամբ,
համատեղ պիտի աղօթեն մեր երկրի եւ Եկեղեցւոյ զօրացման, մասնակիցներու առողջութեան, խաղաղութեան
եւ գործերու յաջողութեան համար: Այսուհետեւ “Խոկման” արարողութիւններու շարքը պիտի
վերականգնէ իր բնականոն ընթացքը: Արարողութիւնները պիտի մեկնարկեն ամէն Երեքշաբթի ժամը
18:00-ին: Սուրբ Գրիգոր Լուսաւորիչ մայր եկեղեցւոյ հոգեւոր հովիւ եւ “Խոկման” արարողութեան
կազմակերպման պատասխանատու Տէր Յակոբ քահանայի նախաձեռնութեամբ “Խոկման” արարողութիւնը
պիտի շարունակէ կրել “Եկեղեցին մեր տունն է” խորագիրը: Խոկման արարողութեան ընթացքին
կ’ընթերցուի աղօթք, ապա կը ներկայացուի քարոզ, այնուհետեւ կ’անջատուին եկեղեցու բոլոր
լոյսերը, եւ հոգեւոր երգեցողութեան, թոյլ մոմերու լուսաւորութեան ներքոյ հաւատացեալը
կը խոկայ, այսինքն` ինքն իր մէջ կը վերլուծէ լսածը, կը քաղէ այն, ինչ որ պէտք է իր կեանքի
այդ պահուն համար եւ կ’աղօթէ: Խոկման մասնակիցները բացառիկ միջավայր կ’ունենան Մայր Եկեղեցւոյ
զօրացման, հայրենիքի եւ ժողովուրդի բարօրութեան, հոգեւոր վերելքի համար խորհելու, մտորելու,
աղօթելու, իրենց հոգեւոր վիճակը քննելու եւ գնահատելու ուղղութեամբ