Французскі Прэзідэнт Аланд упершыню прыбудзе ў Ватыкан
У Святым Пасадзе пацвердзілі,
што 24 студзеня 2014 г. адбудзецца сустрэча паміж папам Францішкам і Прэзідэнтам Французскай
Рэспублікі Франсуа Аландам. Гэта будзе першы візіт палітыка у Ватыкан. Аб гэтым заявіў
9 студзеня 2013 г. кіраўнік Залы Друку Апостальскай Сталіцы, кс. Фэдэрыка Ламбардзі.
Спатканне было запланавана зусім нядаўна, і падрыхтоўка да яго ўсё яшчэ працягваецца,
паведаміла французскае каталіцкае выданне “La Croix”. Склад прэзідэнцкай дэлегацыі
яшчэ не пацверджаны абодвума бакамі.
Трэба адзначыць, што ў Францыі па ініцыятыве
Аланда ў апошні час былі прыняты рашэнні, якія выклікалі буру пратэстаў з боку католікаў
і заклапочанасць Святога Пасаду. Гаворка ідзе, перш за ўсё, пра нядаўнюю легалізацыю
аднаполых саюзаў або праекты, арыентаваныя на легалізацыю эўтаназіі і дапамогу ў самагубстве.
Апошні
візіт французскага кіраўніка дзяржавы ў Ватыкан адбыўся 8 кастрычніка 2010 г. Тады
адбылася сустрэча паміж Бэнэдыктам XVI і Нікаля Сарказі.