Апостальская Сталіца надала мовам майя статус літургічных
Святы Пасад афіцыйна
зацвердзіў літургічныя тэксты на дзвюх карэнных мовах, якія належаць да сямейства
майя: цэльтальскай і цацыльскай. Іх выкарыстоўваюць індзейцы ў штаце Ч’япас на поўдні
Мексікі. Адпаведнае рашэнне ў гэтай справе прыняў папа Францішак ў кастрычніку 2013
г., паведаміў 8 студзеня 2014 г. італьянскі інтэрнэт-партал “il Sismografo”, са спасылкай
на амерыканскія крыніцы. Намаганні па прызнанні карэннамоўных версій літургічных абрадаў
дыяцэзія Сан-Крыстабаль-дэ-Лас-Касас у штаце Ч’япас прадпрыняла яшчэ сем гадоў таму.
Цяпер на абедзьвух мовах святары змогуць цэлебраваць св. Імшу і ўдзяляць сакрамэнты.
Падлічана,
што па крайняй меры 65% жыхароў штату, размешчанага ў паўднёва-заходняй частцы краіны,
належаць да майя; большасць з іх выкарыстоўваюць ў асноўным сваю родную мову і крыху
ведаюць іспанскую. Такім чынам ужыванне ў літургічным жыцці карэнных моў мае вялікае
значэнне ў справе евангелізацыі і катэхізацыі мясцовага насельніцтва.
Біскуп
Сан-Крыстабаль Фэліпэ Арысмэндзі Эсківэль лічыць, што рашэнне Святога Пасаду “павышае
давер да Касцёла” з боку мясцовага насельніцтва. “Несумненна, Папа паказаў новы падыход
да справы” змены сітуацыі ў нашай дзяржаве, сказаў дапаможны біскуп дыяцэзіі Энрыке
Дыяс у інтэрв’ю “BBC”. Ён падкрэсліў, што ў Аргентыне цяперашні Пантыфік шмат часу
прысвячаў карэнным супольнасцям і таму добра разумее іх праблемы.
Па дадзеных
амерыканскіх крыніц, цэльтальскай і цацыльскай мовамі карыстаюцца каля 650 тыс. жыхароў
штата Ч’япас.